လျှပ်စစ်မီတာခ ပြောင်းလဲသတ်မှတ်ခြင်းမပြုမီ ဗို့အားတည်ငြိမ် မှန်ကန်ခြင်း ကဲ့သို့သော ဝန်ဆောင်မှုများပေးနိုင်ရန် ဆောင်ရွက်နေကြောင်း လျှပ်စစ်နှင့်စွမ်းအင်ဝန်ကြီးဌာန ဒုတိယအမြဲတမ်းအတွင်းဝန် ပြောကြား

နေပြည်တော်ရှိ ဝန်ကြီးဌာနတွင် နိုဝင်ဘာ ၉ ရက်က ပြုလုပ်သော လစဉ်သတင်းထုတ်ပြန် ရှင်းလင်းပွဲကို တွေ့ရစဉ်

လျှပ်စစ်မီတာခ ပြောင်းလဲသတ်မှတ်ခြင်းမပြုမီ ဗို့အားတည်ငြိမ်မှန်ကန်ခြင်း ကဲ့သို့သော ဝန်ဆောင်မှုများ သုံးစွဲသူပြည်သူများထံပေးနိုင်ရန် လျှပ်စစ်နှင့် စွမ်းအင်ဝန်ကြီးဌာန အနေဖြင့် ပြင်ဆင်ဆောင်ရွက်နေကြောင်း ဒုတိယအမြဲတမ်းအတွင်းဝန် ဦးစိုးမြင့်က ပြောကြားသည်။

“ဒီဟာကို ပြင်ဆင်နိုင်ဖို့အတွက် စိတ်ချရသော၊ တည်ငြိမ်သော လျှပ်စစ်ဖြစ်ဖို့အတွက် ဝန်ဆောင်မှုတွေ ကျွန်တော်တို့ အရင်ဆုံး ဖြည့်ဆည်းပေးနေပါတယ်။ ဝန်ဆောင်မှုတွေ ကောင်းအောင်လုပ်ပေးပြီးပြီဆိုမှ ပြင်ဆင်ဖို့အတွက် စီမံဆောင်ရွက်မှာ ဖြစ်ပါတယ်။ သို့သော် ဝန်ဆောင်မှုကောင်းအောင် တစ်ဖက်ကလည်း လုပ်နေသလို တစ်ဖက်ကလည်း ဒါကို ဟန်ချက်ညီလုပ်သွားမှာ ဖြစ်ပါတယ်။ အချိန်တန်ရင် ပြန်ပြီးရှင်းလင်းတင်ပြပေးမှာ ဖြစ်ပါတယ်” ဟု ဒုတိယအမြဲတမ်းအတွင်းဝန် ဦးစိုးမြင့်က ပြောကြားသည်။

နေပြည်တော်ရှိ လျှပ်စစ်နှင့်စွမ်းအင်ဝန်ကြီးဌာနတွင် နိုဝင်ဘာ ၉ ရက်က ပြုလုပ်သော လစဉ်သတင်းထုတ်ပြန် ရှင်းလင်းပွဲတွင် ဒုတိယအမြဲတမ်းအတွင်းဝန်က အထက်ပါအတိုင်း ပြောကြားခဲ့ခြင်းဖြစ်သည်။

လျှပ်စစ်နှင့် စွမ်းအင်ဝန်ကြီးဌာနအနေဖြင့် သုံးစွဲသူပြည်သူများအတွက် လိုအပ်ချက်ကို ဖြည့်ဆည်းရန်နှင့် ပိုကောင်းသော ဝန်ဆောင်မှုများပေးရန် အဓိကတာဝန်ရှိကြောင်း၊ ထို့အတွက် ပြင်ဆင်သတ်မှတ်သည့် ဓာတ်အားခကို သုံးစွဲသူများ ပေးရကျိုးနပ်စေရန်အတွက် ဆောင်ရွက်နေကြောင်း ၎င်းက ပြောကြားသည်။

“တချို့သတ်မှတ်ထားတဲ့ ဓာတ်အားလိုင်းတွေ၊ ဥပမာကွန်ထရိုးဓာတ်အားလိုင်း ၄၀၀ ဓာတ်အားလိုင်းတွေက အရင်တုန်းက သတ်မှတ်ထားတဲ့ဧရိယာထက် ထပ်မံတိုးချဲ့လာတဲ့လူဦးရေအရ၊ မိသားစုအနေအထားအရ သတ်မှတ်ထားတဲ့ ဧရိယာကိုကျော်ပြီးတော့ ကျွန်တော်တို့ပေးနေတာတွေ ရှိပါတယ်။ ပေးထားတဲ့အချိန်မှာ တချို့သောနေရာတွေမှာ ဗို့အားမပြည့်မီတာတွေ ရှိပါတယ်။ ဒီလို ဗို့အားမပြည့်မီတာကို ဗို့အားပြည့်မီဖို့အတွက် ဒုတိယဝန်ကြီးဦးစီးပြီးတော့ အခုဆိုရင် တိုင်းဒေသကြီး သုံးခုမှာ ဗို့အားတွေပြည့်မီအောင် ဆောင်ရွက်ပေးနေပါတယ်။ စစ်ကိုင်းတိုင်းမှာ လုပ်ပြီးသွားပြီ၊ မုံရွာမှာ လုပ်ပြီးသွားပြီ။ မန္တလေးတိုင်းဒေသကြီးအတွင်းမှာ လုပ်ပြီးသွားပြီ။ ပဲခူးအရှေ့မှာလည်း လုပ်ပြီးသွားပြီ ဖြစ်ပါတယ်” ဟု ဒုတိယအမြဲတမ်းအတွင်းဝန်က ပြောကြားသည်။

မီတာခ ပြောင်းလဲသတ်မှတ်ခြင်းသည် ကာလရှည် သတ်မှတ်ဆောင်ရွက်ရမည့်ကိစ္စ ဖြစ်ပြီး အမြန်ဆောင်ရွက်၍ မရသည့်အတွက် လတ်တလောတွင် ထုတ်ပြန်၍ မရသေးကြောင်းလည်း ၎င်းက ပြောကြားသည်။

“ကျွန်တော်တင်ပြခဲ့သလိုပဲ အဓိက,က သုံးစွဲသူပြည်သူကို ကျေနပ်သည်အထိ ဝန်ဆောင်မှုပေးနိုင်မှ၊ ထို့အတူ မုန့်တစ်ခုဝယ်တယ်။ ဒီမုန့်တန်လား ကျွန်တော်တို့ကြည့်မယ်။ တန်ရင် ၅၀ လည်းပေးမယ်။ ၁၀၀ လည်း ပေးမယ်။ အဲဒီလို သဘောပါပဲ။ တစ်ဖက်က ကျေနပ်မှုရှိအောင်လုပ်ပေးမယ်။ တစ်ဖက်ကလည်း ပြင်တဲ့ဟာလုပ်မယ်။ ပြင်တဲ့နေရာမှာ ထပ်ပြီးတင်ပြရရင် အခြေခံလူတန်းစားကို မထိခိုက်တဲ့နှုန်းကို ကျွန်တော်တို့ ဆောင်ရွက်ပေးသွားမှာ ဖြစ်ပါတယ်” ဟု ဒုတိယအမြဲတမ်းအတွင်းဝန် ဦးစိုးမြင့်က ပြောကြားသည်။