မြန်မာနိုင်ငံမှသစ်များ တရားဝင်တင်ပို့ခြင်းဖြစ်ကြောင်း အာမခံပေးနိုင်မည့် အဖွဲ့အစည်းတစ်ခုဖွဲ့စည်းရန် ပြင်ဆင်နေကြောင်းသိရ

မြန်မာနိုင်ငံမှ ထုတ်လုပ်တင်ပို့ရောင်းချသောသစ်များ တရားဝင်တင်ပို့ခြင်းဖြစ်ကြောင်း အာမခံပေးနိုင်မည့် အဖွဲ့အစည်းတစ်ခု ဖွဲ့စည်းရန် ပြင်ဆင်နေပြီဖြစ်ကြောင်း နိုဝင်ဘာ ၉ ရက်တွင် ရှမ်းပြည်နယ် အစိုးရအဖွဲ့ သယံဇာတနှင့် ပတ်ဝန်းကျင်ထိန်းသိမ်းရေးဝန်ကြီး ဒေါက်တာညီညီအောင်က ပြောကြားသည်။

မြန်မာနိုင်ငံမှ ထုတ်လုပ်တင်ပို့သော သစ်များသည် မှောင်ခိုသစ်မဟုတ်ဘဲ တရားဝင်ထုတ်လုပ်ခြင်းဖြစ်ကြောင်း၊ နောက်ကြောင်းရှင်းကြောင်းနှင့် မည်သည့်သစ်တောအတွင်းမှ ထုတ်လုပ်တင်ပို့ရောင်းချလိုက်သည်ဆိုသည့် အချက်အလက်များကို စာရင်းကောက်ယူမည်ဖြစ်ပြီး နိုင်ငံတကာကို အာမခံပေးနိုင်မည့် အဖွဲ့အစည်းတစ်ခုဖြစ်သော FLET - BPA ဟုခေါ်သော သစ်တောဥပဒေ စိုးမိုးမှု၊ အုပ်ချုပ်မှုနှင့် ကုန်သွယ်မှုဆိုင်ရာ မိတ်ဖက်အဖြစ် ဆန္ဒအလျောက် သဘောတူညီချက်ဟု အဓိပ္ပာယ်ရပြီး မြန်မာနိုင်ငံနှင့် ဥရောပသမဂ္ဂနိုင်ငံတို့ ပူးပေါင်းဆောင်ရွက်ခြင်းဖြစ်ကြောင်း သိရသည်။

အဆိုပါ FLET- BPA ကို အခြားနိုင်ငံများတွင် လုပ်လက်စအရှိန်ရနေပြီး မြန်မာနိုင်ငံတွင် ယခုအချိန်တွင် လက်မှတ်ထိုးရန် ပြင်ဆင်နေပြီဖြစ်ကြောင်း၊ အဓိကအားဖြင့် အစိုးရ၊ အရပ်ဘက်အဖွဲ့အစည်းနှင့် ပုဂ္ဂလိကကဏ္ဍ သုံးပွင့်ဆိုင်ညွန့်ပေါင်းအဖွဲ့ ပါဝင်မည်ဖြစ်ပြီး ပြည်ထောင်စုအဆင့်မှစတင်ကာ ပြည်နယ်အဆင့်အထိ အဆင့်ဆင့်ဖွဲ့စည်းရန် ပြင်ဆင်နေပြီဖြစ်ကြောင်း၊ လောလောဆယ်တွင် ပြည်ထောင်စုအဆင့်တွင် စီမံချက်များရေးဆွဲနေပြီဖြစ်ကြောင်း၊ ရှမ်းပြည်နယ်အစိုးရထံသို့ အဖွဲ့ဖွဲ့ရန် ညွှန်ကြားစာရောက်ရှိလာပြီဖြစ်ကြောင်း ရှမ်းပြည်နယ်အစိုးရအဖွဲ့ သယံဇာတနှင့် ပတ်ဝန်းကျင်ထိန်းသိမ်းရေးဝန်ကြီး ဒေါက်တာညီညီအောင်က ပြောကြားသည်။

“ပြည်နယ်အဆင့်မှာ ပြည်နယ်နှင့် တိုင်းဒေသကြီးအစိုးရအဖွဲ့ဝင် ဝန်ကြီးတစ်ယောက်ယောက်က ဦးဆောင်နာယကအနေနဲ့ တာဝန်ယူပါမယ်။ ကျန်တဲ့ကဏ္ဍသုံးရပ်အလိုက် အစိုးရဆိုရင် ဌာနဆိုင်ရာပါမယ်။ ပုဂ္ဂလိကဆိုရင် သစ်ထုတ်လုပ်ရေးနဲ့ သက်ဆိုင်တဲ့ ပုဂ္ဂလိကကိုယ်စားလှယ်တွေပါမယ်။ CSO ဆိုရင်လည်း သစ်သယံဇာတနဲ့ အဖွဲ့တွေ သဘာဝပတ်ဝန်းကျင်ထိန်းသိမ်းရေး ကိုယ်စားလှယ်တွေထည့်မယ်။ မြန်မာနိုင်ငံကနေ နိုင်ငံတကာကိုတင်ပို့လိုက်တဲ့သစ်တွေမှာ တရားဝင်ဖြစ်ပါတယ်ဆိုတဲ့ အာမခံချက်တွေ လုပ်ပေးဖို့အစီအစဉ်ဖြစ်ပါတယ်။ နိုင်ငံတကာ ဈေးကွက်မှာ သစ်ဝယ်ယူတဲ့အဖွဲ့တွေဆိုရင် ဒီလိုအချက်တွေပါမယ်။ ပြောရရင် နောက်ကြောင်းရှင်းတဲ့အကြောင်း၊ တရားဝင်ဖြစ်ကြောင်း၊ မှောင်ခိုမဟုတ်ကြောင်း အာမခံချက်ပေးဖို့ဖြစ်ပါတယ်။ နောက်ဆုံး ဘယ်တော ဘယ်လုပ်ကွက်ထဲကနေ ထုတ်သွားတယ်ဆိုတာကအစ ဒေတာရဖို့ စီစဉ်နေတယ်လို့လည်း သိရပါတယ်” ဟုသယံဇာတနှင့် ပတ်ဝန်းကျင်ထိန်းသိမ်းရေးဝန်ကြီး ဒေါက်တာညီညီအောင်က ပြောကြားသည်။