Photo: DailyMail
အင်္ဂလန်ကလပ်အသင်းများအနက် လူမှုရေးမီဒီယာများတွင် ပရိသတ်အားပေးမှု အများဆုံးအဖြစ် မန်ယူအသင်းက ရပ်တည် လျက်ရှိကြောင်း ဗြိတိန်အခြေစိုက် Daily Mail သတင်းဌာနက စစ်တမ်းတစ်ရပ်ထုတ်ပြန်ခဲ့သည်။
ပရီးမီးယားလိဂ်ပြိုင်ပွဲသည် ကမ္ဘာတစ်ဝန်း ဘောလုံးလိဂ်ပြိုင်ပွဲအများအနက် ရုပ်သံထုတ်လွှင့်ခွင့်ဝင်ငွေအများဆုံးအဖြစ် စံချိန်တင်ထားပြီး ပရီးမီးယားလိဂ်ကလပ်များမှာလည်း ကမ္ဘာ့အချမ်းသာဆုံးကလပ်စာရင်း၌ ထိပ်တန်းနေရာ ရပ်တည်လျက်ရှိသည်။
ထို့ ပြင် ကလပ်အသင်းများသည် ဒီဂျစ်တယ်နှင့် လူမှုရေးမီဒီယာများမှတစ်ဆင့် ပရိသတ် (Follower) အရေအတွက် မြင့်တက်လာရန်နှင့် ဝင်ငွေပိုမိုရရှိစေရန် နည်းလမ်းမျိုးစုံအသုံးပြု၍ ထိုးဖောက်လျက်ရှိပြီး ၎င်းတို့အနက် မန်ယူအသင်းက ပရိသတ်အားပေးမှုအများဆုံးအဖြစ် ရပ်တည်နေခြင်းဖြစ်သည်။
ယင်းစစ်တမ်းအရ မန်ယူအသင်းသည် Facebook တွင် ပရိသတ် ၇၃ ဒသမ ၈ သန်း၊ Instagram တွင် ၁၉ ဒသမ ၆ သန်း၊ Twitter တွင် ၁၅ ဒသမ ၆ သန်း၊ Google+ တွင် ၆ ဒသမ ၈ သန်း၊ စုစုပေါင်း ၁၁၅ ဒသမ ၈ သန်းဖြင့် ထိပ်ဆုံးနေရာ ရပ်တည်နေခြင်းဖြစ်သည်။
မန်ယူအသင်းသည် YouTube မှလွဲ၍ အခြားဒီဂျစ်တယ်နှင့် လူမှုရေးမီဒီယာများတွင် ပြိုင်ဘက်အသင်းများထက် ပရိသတ်အရေအတွက်ပိုများပြီး အနီးဆုံးပြိုင်ဘက် ချယ်လ်ဆီးအသင်း၏ ပရိသတ်စုစုပေါင်းထက် ၃၉ သန်း ပိုများကြောင်း သိရသည်။
မန်ယူနှင့် ချယ်လ်ဆီးအသင်း၏နောက်တွင် အာဆင်နယ်အသင်း က ၆၅ ဒသမ ၄ သန်း၊ လီဗာပူးလ်အသင်းက ၄၉ ဒသမ ၉ သန်း၊ မန်စီးတီးအသင်းက ၄၃ ဒသမ ၇ သန်း၊ စပါးအသင်းက ၁၃ ဒသမ ၁ သန်း၊ လက်စတာအသင်းက ၉ ဒသမ ၂ သန်း၊ အဲဗာတန်အသင်းက ၅ ဒသမ ၂ သန်း၊ ဝက်စ် ဟမ်းအသင်းက ၅ သန်း၊ လိဂ်ချန်ပီယံရှစ် ကလပ် အက်စတွန်ဗီလာအသင်းက ၃ ဒသမ ၈ သန်းဖြင့် အစဉ်လိုက် ရပ်တည်နေသည်။
အားကစားဆိုင်ရာအစီအစဉ်များအား ရုပ်သံထက် မိုဘိုင်းဖုန်းမှတစ်ဆင့် ကြည့်ရှုသူများသည် အသက် ၁၈ နှစ်မှ ၃၄ နှစ် အတွင်း အများဆုံးဖြစ်ကြောင်း ယင်းစစ်တမ်း တွင် ဖော်ပြထားသည်။ အားကစားသမားများအနက် လူမှုရေးမီဒီယာများတွင် ပရိသတ်အများဆုံးအဖြစ် စီရော်နယ်လ်ဒိုက သန်း ၂၀၀ ကျော်ဖြင့် ရပ်တည်လျက်ရှိသည်။
