Photo: Mirror
ဝက်စ်ဟမ်းအသင်းအားပေးသူပရိသတ်အများစုသည် ဝက်စ်ဟမ်းနည်းပြသစ်အဖြစ် ဒေးဗစ်မွိုက်စ်အား ခန့်အပ်လိုက်ခြင်းကို ကျေနပ်မှုမရှိကြဘဲ လူမှုကွန်ရက်စာမျက်နှာများ ၌ ပြစ်တင်ဝေဖန်မှုများပြုလုပ်ခဲ့ကြကြောင်း သိရှိရသည်။
ဒေးဗစ်မွိုက်စ်အား နည်းပြသစ်အဖြစ် ခန့်အပ်ခြင်းကို ဝက်စ်ဟမ်းပရိသတ်အနည်းစုကသာကြိုဆိုခဲ့ကြပြီး အများစုက ၎င်းအား လက်မခံလိုသည့်သဘောထားကို ပြခဲ့ခြင်း ဖြစ်သည်။ ဝက်စ်ဟမ်းအသင်း တာဝန်ရှိသူ များသည် ပြီးခဲ့သည့် နိုဝင်ဘာ(၆)ရက်(တနင်္လာနေ့)က ခရိုအေးရှားလူမျိုးနည်းပြ ဘီလစ်အား ရာထူးမှထုတ်ပယ်လိုက်ပြီး ပရက်စတန်၊ အဲဗာတန်၊ မန်ယူ၊ ဆိုစီဒက်၊ ဆန်းဒါးလန်းအသင်းများ ကိုကိုင်တွယ်ခဲ့ဖူးသူ စကော့တလန်လူမျိုးနည်းပြ ဒေးဗစ်မွိုက်စ်အား နည်းပြသစ်အဖြစ် တာဝန်ပေးအပ်ခဲ့ခြင်းဖြစ်သည်။
ဗြိတိန်သတင်းစာ Daily Mail က ဒေးဗစ်မွိုက်စ်မှာ ဝက်စ်ဟမ်းအသင်းနည်းပြအဖြစ် သင့်တော်သောသူတစ်ဦး ဖြစ်သလားဟု အွန်လိုင်းတွင် ဆန္ဒမဲကောက်ခံခဲ့ရာ ပရိသတ် (၇၄)ရာခိုင်နှုန်းက အသင်းနှင့်သင့်တော်မှု မရှိဟု ကန့်ကွက်မဲပေးခဲ့ကြကြောင်း သိရှိရသည်။ Daily Mail သတင်းစာသည် ဝက်စ်ဟမ်းပရိသတ်(၁၆၀၀၀)ကို ဆန္ဒမဲကောက်ခံခဲ့ ခြင်းဖြစ်ကြောင်း သိရှိရသည်။
ယခုအခါ ကလပ်အသင်း၏ Twitter စာမျက်နှာ၌ ပရိသတ်များက ဒေးဗစ်မွိုက်စ်ကို ဆန့်ကျင်ကန့်ကွက်သည့် Comment များစွာပေးနေကြကြောင်း သိရှိရသည်။ ဝက်စ်ဟမ်းအသင်းသည် ဒေးဗစ်မွိုက်စ်အား နည်းပြသစ်အဖြစ် ခန့်အပ်သည့် ဗီဒီယိုဖိုင်ကို ၎င်းတို့၏ Twitter စာမျက်နှာ၌တင်ခဲ့ပြီး ယင်းဗီဒီယိုဖိုင်တွင် ဒေးဗစ်မွိုက်စ်က "ဝက်စ်ဟမ်းအသင်းအားပေးသူပရိသတ်များနှင့် မိမိ အပြုသဘော ဆောင်ကာတွေ့ဆုံလိုပြီး အသင်းအောင်မြင်မှုများရရှိရန်အတွက်ကြိုးပမ်းလိုကြောင်း" ပြောကြားခဲ့သည်။
သို့သော် ယင်း ဗီဒီယိုဖိုင်တင်ထားသည့် Post အောက်၌ ဝက်စ်ဟမ်းပရိသတ် အများစုက ၎င်းကို မလိုလားသည့် Comment များပေးခဲ့ကြသည်။ ဒေးဗစ်မွိုက်စ်ကိုခန့်အပ်ခြင်းမှာ ကလပ်အသင်းအနေဖြင့် တန်းဆင်းတော့ မည်ဟု ကြေညာခြင်းသာဖြစ်သည်ဟု ပရိသတ်အချို့က လှောင်ပြောင်ခဲ့ကြသလို၊ လာမည့်ရာသီ၌ လန်ဒန်အိုလံပစ်ကွင်းတွင် လိဂ်ချန်ပီယံရှစ်ပွဲများ ကစားသည်ကိုတွေ့ရတော့မည် ဟု အချို့ကလည်း ရေးသားခဲ့သည်။
ဝက်စ်ဟမ်းအသင်းဘုတ်အဖွဲ့အနေ ဖြင့် ပရိသတ်အများစု၏ဆန္ဒကို အသိအမှတ်မပြုဘဲ လျစ်လျူရှုခဲ့သည်ဟု ဝက်စ်ဟမ်းပရိသတ်အချို့က စွပ်စွဲခဲ့ကြသည်။ အချို့သောပရိသတ်များကမူ အသင်းအနေဖြင့် ယခုအချိန်တွင် စည်းလုံးညီညွတ်မှုရှိရန်လိုအပ်သည်ဟု အချင်းချင်းသတိပေးခဲ့ကြသည်။
ဒေးဗစ်မွိုက်စ်သည် မန်ယူ၊ ဆိုစီဒက်နည်းပြ ရာထူးများမှ ထုတ်ပယ်ခံခဲ့ရသူဖြစ်ပြီး ပြီးခဲ့သည့်ရာသီကလည်း သူကိုင်တွယ်ခဲ့သော ဆန်းဒါးလန်းအသင်းမှာ တန်းဆင်းခဲ့ပြီးနောက် ဆန်းဒါးလန်းနည်းပြ ရာထူးမှ နုတ်ထွက်ခဲ့သူဖြစ်သည်။ လက်ရှိအချိန်တွင် ဝက်စ်ဟမ်းအသင်းမှာ ပရီးမီးယားလိဂ်ပွဲစဉ်(၁၁)ပွဲကစားပြီးချိန်၌ နိုင်ပွဲ(၂)ပွဲသာရရှိထားပြီး (၃)ပွဲသရေ၊ (၆)ပွဲရှုံး၊ ရမှတ်(၉)မှတ်ဖြင့် တန်းဆင်းဇုန်အတွင်း အဆင့်
(၁၈)သို့ ရောက်ရှိနေသည်။
