အင်တာနက်အသုံးပြုရာတွင် လုံခြုံမှုရှိစေရေးနှင့်ပတ်သက်ပြီး ကျောင်းသားကျောင်းသူများကို Telenor က အသိပညာပေးနေစဉ်

မြန်မာနိုင်ငံတွင် အဓိကရင်ဆိုင်နေရသော အတားအဆီးမှာ ဆိုက်ဘာခြိမ်းခြောက်မှုများနှင့် လုံခြုံရေးဆိုင်ရာ ဘေးအန္တရာယ်များဖြစ်ကြောင်း မိုက်ခရိုဆော့ဖ်လေ့လာချက်တွင် ဖော်ပြထားကြောင်း သိရသည်။

ဘဏ္ဍာရေးအဖွဲ့အစည်းများမှ လုပ်ငန်း ဦးဆောင်သူများသည် ဒစ်ဂျစ်တယ်ခေတ်ကို မည်သို့ လက်ခံရင်ဆိုင်နေရသည်ကို နားလည်နိုင်ရန်အတွက် မိုက်ခရိုဆော့ဖ်အာရှ၏ ဒစ်ဂျစ်တယ် အသွင်ကူးပြောင်းရေးလေ့လာချက်သည် အာရှပစိဖိတ်ဈေးကွက် ၁၃ ခုတွင် ဝန်ထမ်း ၂၅၀ အထက်ဖြင့်လည်ပတ်နေသော အဖွဲ့အစည်းများမှ လုပ်ငန်းခေါင်းဆောင် ၁၄၉၄ ဦးအား စစ်တမ်းကောက်ယူခဲ့ကြောင်း သိရသည်။

လုပ်ငန်းအတွင်းဆက်လက် ရပ်တည်နိုင်ရေးအတွက် ဒစ်ဂျစ်တယ်သို့ပြောင်းလဲရန် လိုအပ်သည်ဟု အာရှပစိဖိတ်ဒေသရှိ ဘဏ္ဍာရေး ဝန်ဆောင်မှုလုပ်ငန်းဦးဆောင်သူများ၏ ၈၁ ရာခိုင်နှုန်းအနေဖြင့် ယုံကြည်ကြောင်း မိုက်ခရိုဆော့ဖ်လေ့လာချက် စစ်တမ်းတွင် ဖော်ပြချက်အရ သိရသည်။

မြန်မာနိုင်ငံတွင်လည်း ဘဏ္ဍာရေး ဝန်ဆောင်မှုအဖွဲ့အစည်းများ လုပ်ငန်းများ တိုးပွားလာသည်နှင့်အမျှ ဒစ်ဂျစ်တယ်စနစ်သို့ အသွင်ကူးပြောင်းသော နည်းဗျူဟာကို အသုံးပြုလာကြပြီး အသွင်ကူးပြောင်းမှု ခရီးစဉ်ကို စတင်လျှောက်လှမ်းလာကြသည်ဟု စစ်တမ်းတွင် ဖော်ပြထားသည်။

အာရှပစိဖိတ်ဒေသတွင်း လေ့လာချက်များအရ စစ်တမ်းဖြေကြားသူများ၏ ၃၁ ရာ ခိုင်နှုန်းသည် ၎င်းတို့၏ လုပ်ငန်းများအတွင်း ဒစ်ဂျစ်တယ်နည်းဗျူဟာကို အပြည့်အ၀ အသုံးချနေပြီဖြစ်ပြီး ၂၈ ရာခိုင်နှုန်းခန့်မှာ ၎င်းတို့ စိတ်ကျေနပ်သောရလဒ် အနေအထား ရရှိနေပြီဟု ဖြေကြားခဲ့ကြကြောင်း သိရသည်။

ဖွံ့ဖြိုးဆဲ ဈေးကွက်တစ်ခုဖြစ်သည့် မြန်မာနိုင်ငံအတွင်း ဘဏ္ဍာရေးဝန်ဆောင်မှု လုပ်ငန်းများအနေဖြင့် ဒစ်ဂျစ်တယ် အသွင်ကူးပြောင်းရေးတွင် အဓိကရင်ဆိုင်နေရသော အတားအဆီးတစ်ခုမှာ ဆိုက်ဘာ ခြိမ်းခြောက် မှုများနှင့်လုံခြုံရေးဆိုင်ရာ ဘေးအန္တရာယ်များ ဖြစ်ကြောင်း သိရသည်။

၂၀၁၇ သြဂုတ်လအတွင်း ထုတ်ပြန်ခဲ့သည့် မိုက်ခရိုဆော့ဖ်၏ လုံခြုံရေးထောက်လှမ်းမှု အစီရင်ခံစာတွင် Malware ကြောင့် ထိခိုက်နိုင်ခြေအများဆုံးသော ထိပ်ဆုံးငါးနိုင်ငံတွင် မြန်မာနိုင်ငံမှာ ပါဝင်လျက်ရှိကြောင်း အဆိုပါ လေ့လာချက်တွင် ဖော်ပြထားချက်အရ သိရသည်။

ထို့ပြင် ဒစ်ဂျစ်တယ်ပိုင်းဆိုင်ရာ ကျွမ်းကျင်လုပ်သားရှားပါးခြင်းနှင့် ယုံကြည်စိတ်ချရသော အခြေခံအဆောက်အအုံရှားပါးခြင်းတို့မှာ ဒစ်ဂျစ်တယ်စနစ်သို့ အသွင်ကူးပြောင်းမှုကို နှောင့်နှေးစေကြောင်း လေ့လာချက်တွင် ဖော်ပြထားသည်။

“အာရှမှာရှိတဲ့ FSI အဖွဲ့အစည်းတွေဟာ ဒစ်ဂျစ်တယ်အသွင်ကူးပြောင်းရေးရဲ့ အစောပိုင်းအဆင့်မှာပဲရှိပါသေးတယ်။ စစ်တမ်း ကောက်ယူထားတဲ့အဖွဲ့အစည်းတွေထဲကမှ ၃၁ ရာခိုင်နှုန်းပဲ ဒစ်ဂျစ်တယ်နည်းဗျူဟာကို အပြည့်အ၀ အသုံးချနေတယ်လို့သိရပါတယ်”ဟု မိုက်ခရိုဆော့ဖ် အာရှပစိဖိတ်၏  Marketing and Operations မှ Rena Chai က ပြောကြားသည်။

မြန်မာနိုင်ငံတွင် ဆိုက်ဘာလုံခြုံရေးနှင့် ပတ်သက်ပြီး အစိုးရအဖွဲ့အစည်းများ၊ ကုမ္ပဏီများအနေဖြင့် အာရုံထားလုပ်ဆောင်လာခြင်းများ ရှိနေသော်လည်း လုံလောက်သည့် အခြေအနေတစ်ရပ်သို့ မရောက်ရှိသေးကြောင်း နည်းပညာကျွမ်းကျင်သူများ၏ ပြောကြားချက်များအရ သိရသည်။