ကမာရွတ်မြို့နယ်၌ City Mart ဝန်ထမ်းနှစ်ဦး စားသောက်ကုန်ပစ္စည်းများ စစ်နေစဉ် စကားများပြီး ဓားဖြင့်ထိုးမှု ဖြစ်ပွားခဲ့ကြောင်း နိုဝင်ဘာ ၈ ရက်တွင် ရန်ကုန်တိုင်းဒေသကြီး ရဲတပ်ဖွဲ့မှ သိရသည်။
နိုဝင်ဘာ ၇ ရက် ညနေ ၅ နာရီခန့်တွင် သင်္ဃန်းကျွန်းမြို့နယ်နေ ကို ...(၃၀ နှစ်) သည် နေအိမ်၌ရှိနေစဉ် Junction Square City Mart တွင် အလုပ်လုပ်ကိုင်နေသည့် ၎င်း၏တူဖြစ်သူကို ... (၁၈ နှစ်) မှာ ဓားထိုးခံရသဖြင့် ရန်ကုန်ဆေးရုံကြီးသို့ ရောက်ရှိနေကြောင်း ဆိုင်မန်နေဂျာက ဖုန်းဆက် အကြောင်းကြားသဖြင့် သွားရောက်ကြည့်ရှု မေးမြန်းခဲ့ကြောင်း သိရသည်။
ထို့နောက် ကို ...(၃၀ နှစ်) မှာ Junction Square City Mart ၏ မန်နေဂျာအား မေးမြန်းရာ ၎င်း၏တူဖြစ်သူ ကို...(၁၈ နှစ်) မှာ အဆိုပါ City Mart ရှိ စတိုပစ္စည်းလက်ခံ ဌာနမှ ဝန်ထမ်းအောင်ဝင်းထွဋ် (၂၅ နှစ်) နှင့် စားသောက်ကုန် ပစ္စည်းများ စစ်ဆေးနေစဉ် စကားများခဲ့ကြောင်း သိရသည်။
ထိုသို့စကားများစဉ် ကို ... (၁၈ နှစ်) အား အောင်ဝင်းထွဋ် (၂၅ နှစ်) က အရိုးအသွား ၁၀ လက်မခန့်ရှိ လုပ်ငန်းသုံး လက်ကိုင်အဝါရောင် စတီးဓားဖြင့် ထိုးခဲ့ကြောင်း သိရသည်။
ဓားဖြင့်အထိုးခံရသဖြင့် ကို... (၁၈ နှစ်) မှာ ဝဲလက်မောင်း ထိုးသွင်းဒဏ်ရာ နှစ်ချက်၊ ယာရင်ဘတ် ထိုးသွင်းဒဏ်ရာ တစ်ချက်၊ ဝဲရင်ဘတ် ထိုးသွင်းဒဏ်ရာ တစ်ချက်နှင့် ယာခြေသလုံး စုတ်ပြဲဒဏ်ရာများ ရရှိပြီး ရန်ကုန်ဆေးရုံကြီးသို့ တင်ပို့ထားရကြောင်း သိရသည်။
“ဓားနဲ့အထိုးခံရတဲ့ ကောင်လေးက အရောင်းဝန်ထမ်းပါ။ ထိုးတဲ့သူက ပစ္စည်းလက်ခံဌာနက ဝန်ထမ်းပါ။ သူတို့နှစ်ယောက်က စားသောက်ကုန်ပစ္စည်း စစ်နေတဲ့အချိန်မှာ စကားများကြတာပါ။ ဓားနဲ့အထိုးခံရတဲ့ သူကိုတော့ ဆေးရုံတင်ထားပြီး ထိုးတဲ့သူကိုတော့ ဖမ်းဆီးအမှုဖွင့်ပြီး ဆက်လက် စစ်ဆေးနေပါတယ်” ဟု ရန်ကုန်တိုင်းဒေသကြီး ရဲတပ်ဖွဲ့မှ ရဲအရာရှိတစ်ဦးက ပြောကြားသည်။
ဖြစ်စဉ်မှ ဓားဖြင့်ထိုးသူ အောင်ဝင်းထွဋ်အား ကမာရွတ်မြို့မ ရဲစခန်းက (ပ) ၄၉၄/၂၀၁၇၊ ရာဇသတ်ကြီးပုဒ်မ ၃၂၆ ဖြင့် အမှုဖွင့်ထားပြီး ဖမ်းဆီးစစ်ဆေးနေကြောင်း သိရသည်။
