ကာယကံရှင် ကိုဝင်းဦး၏ ဇနီးဖြစ်သူနှင့် အကျိုးတော်ဆောင်ရှေ့နေတို့ သတင်းစာ ရှင်းလင်းနေသည်ကို တွေ့ရစဉ်
YBS ဘတ်စ်ကား ခရီးသွားလမ်းညွှန်ဆိုင်းဘုတ် ဖျက်ဆီးမှုဖြင့် ထောင်ဒဏ်သုံးနှစ် ချမှတ်ခံရသော ဇော်မင်းထွန်း (ခ) ဝင်းဦး (ဘူးလက်ဂျာနယ် သတင်းထောက်ဟောင်း) နှင့် ပတ်သက်၍ ခရိုင်တရားရုံးသို့ အယူခံတင်မည် ဖြစ်ကြောင်း ကာယကံရှင်၏ ဇနီးဖြစ်သူနှင့် အကျိုးတော်ဆောင်ရှေ့နေတို့က သတင်းစာရှင်းလင်း ပြောကြားသည်။
ကိုဝင်းဦးကို ပြီးခဲ့သည့် အောက်တိုဘာ ၂၀ ရက်က ဒဂုံမြို့သစ်မြောက်ပိုင်းမြို့နယ်တရားရုံး၌ ၁၉၄၇ ခုနှစ် ပြည်သူပိုင်ပစ္စည်း ကာကွယ်ရေးအက်ဥပဒေပုဒ်မ ၆ (၁) ဖြင့် ထောင်ဒဏ်သုံးနှစ် ချမှတ်လိုက်ခြင်းဖြစ် သည်။ ထို့ကြောင့် ကာယကံရှင်၏ဇနီးနှင့် အကျိုးတော်ဆောင်ရှေ့နေတို့က နိုဝင်ဘာ ၈ ရက်တွင် ရန်ကုန်မြို့ မြန်မာဂျာနယ်လစ် ကွန်ရက်ရုံးခန်း၌ သတင်းစာရှင်းလင်းခဲ့ခြင်း ဖြစ်သည်။
“ဖျက်ဆီးတယ်ဆိုရုံနဲ့ ထောင်ဒဏ်သုံးနှစ်ချတာ။ ပျက်စီးသွားလို့ ချတယ်ဆိုရင် ဘာမှမပြောလိုပါဘူး။ ထောင်ဒဏ်က သုံးနှစ်ပါ။ ပြင်းထန်လွန်းပါတယ်။ ဘာမှမဖြစ်တဲ့ အပေါ်မှာ ပြစ်ဒဏ်က များလွန်းတယ်လို့ ယူဆပါတယ်။ လူသတ်မှုတို့၊ မုဒိမ်းမှုတို့ ဂျာနယ်တစ်ခုမှာ ပါတယ်။ သက်ငယ်မုဒိမ်းမှုကို တစ်နှစ်နဲ့ ခြောက်လတဲ့။ အဲဒီလိုလေးတွေ ချသွားတယ်။ သတင်းထောက်မို့လို့ပဲ တရားရုံးက ဖိနှိပ်တာလား။ သူ့အနေနဲ့ အစာငတ်ခံ ဆန္ဒပြလို့ပဲ ဖိနှိပ်တာလား။ ဒါလူသားတစ်ယောက်ရဲ့ အခွင့်အရေး သူ့မိသားစုရဲ့ အခက်အခဲ ဘယ်လောက်အထိ နစ်နာဆုံးရှုံးမယ်ဆိုတာ တရားသူကြီး အနေနဲ့ တွေးပေးသင့်ပါတယ်။ ဒီထက်လျော့တဲ့ ပြစ်ဒဏ်ကို ပေးမယ်ဆိုရင် သတင်းစာ ရှင်းစရာလည်း မလိုဘူး။ အယူခံတက်စရာလည်း မလိုပါဘူး။ အယူခံကိုတော့ လာမယ့် ၁၄ ရက်၊ ၁၅ ရက်လောက် တက်ပါမယ်” ဟု ကိုဝင်းဦး၏ အကျိုးတော်ဆောင် ရှေ့နေဖြစ်သူ မြန်မာမီဒီယာ ရှေ့နေများကွန်ရက်မှ တရားလွှတ်တော်ရှေ့နေ ဦးအောင်ဖြိုးလတ်က ပြောကြားသည်။
လက်ရှိတွင် ကိုဝင်းဦးကို ပြစ်ဒဏ်ချမှတ်ပြီး ဖြစ်သောကြောင့် ပြစ်ဒဏ်လျှော့ရေးကိုသာ အဓိကထားပြီး ခရိုင်သို့ တင်သွင်းမည့် အယူခံ မအောင်မြင်ပါက အဆင့်ဆင့် ထပ်မံလုပ်ဆောင်မည် ဖြစ်ကြောင်း ဦးအောင်ဖြိုးလတ်က ပြောကြားသည်။
“အယူခံတက်ဖို့အတွက် ငွေအင်အားလည်း မရှိတော့ပါဘူး။ လူအင်အားတောင် အနိုင်နိုင်ပါ။ ကျွန်မအမေကလည်း လေဖြတ်နေတယ်။ သုံးနှစ်သား ကလေးတစ်ယောက်နဲ့ အလုပ်အကိုင်လည်း မရှိပါဘူး။ ပေါ့လျော့စေချင်တယ်။ သုံးနှစ်ဆိုတာကို ပေ့ါလျော့စေချင်တယ်။ ကျွန်မမှာ အခက်အခဲတွေ အများကြီးရှိတယ်။ ထောင်ဝင်စာတွေ့ဖို့တောင် အခက်အခဲတွေ ရှိပါတယ်။ သူများထောက်ပံ့ ကူညီမှုနဲ့ ရပ်တည်နေရတာပါ” ဟု ကိုဝင်းဦး၏ဇနီး မစန္ဒာဦးက ပြောကြားသည်။
ပြီးခဲ့သည့် ဇန်နဝါရီ ၁၆ ရက် ည ၁၁ နာရီခန့်က ဒဂုံမြို့သစ် (မြောက်ပိုင်း) မြို့နယ် ပြည်ထောင်စုလမ်းပေါ်ရှိ ဧရာဝတီဘဏ်အနီးတွင် စိုက်ထူထားသည့် YBS ယာဉ်လိုင်း ခရီးသွားလမ်းညွှန် ဆိုင်းဘုတ်ကို ဖျက်ဆီးခဲ့သည် ဟုဆိုကာ ကိုဝင်းဦးအား ဒဂုံမြို့သစ် (မြောက်ပိုင်း) မြို့မရဲစခန်းက (ပ)၈၀/၂၀၁၇၊ ၁၉၄၇ ခုနှစ် ပြည်သူပိုင်ပစ္စည်း ကာကွယ်ရေးအက် ဥပဒေပုဒ်မ ၆ (၁) ဖြင့် အမှုဖွင့်ခဲ့ခြင်း ဖြစ်ကြောင်း သိရသည်။
ပြည်သူပိုင်ပစ္စည်း ဖျက်ဆီးမှုပုဒ်မ ၆ (၁)ဆိုသည်မှာ ပြည်သူပိုင်ပစ္စည်း ကာကွယ်ရေး အက်ဥပဒေ (၁၉၅၇/၈၃) တွင် ပြဋ္ဌာန်းထားသည့် ပုဒ်မ ၆၊ အပိုဒ်ခွဲ ၁ ကို ဆိုလိုခြင်းဖြစ်သည်။ ပြည်သူပိုင်ပစ္စည်း တစ်စုံတစ်ရာကို (က) ပိုင်ဆိုင်ခွင့်မရှိဘဲ လက်ဝယ်ထားခြင်း၊ (ခ) ခိုးယူခြင်း၊ (ဂ) အလွဲသုံးစားမှုပြုခြင်း၊ (ဃ) အကျိုးပျက်စီး စေခြင်းများကို ပြုလုပ်လျှင် ကျူးလွန်သူအား ခုနစ်နှစ်အထိ ထောင်ဒဏ်ဖြစ်စေ၊ ကြိမ်ဒဏ်ဖြစ်စေ၊ ထောင်ဒဏ်နှင့် ကြိမ်ဒဏ်နှစ်ရပ်လုံးအပြင် ငွေဒဏ်ပါ တစ်ပေါင်းတည်း ကျခံစေရန် ပြစ်ဒဏ်ချမှတ် နိုင်သည်ဟု ပြဋ္ဌာန်းထားသည်။
