ယီမင်သူပုန်တို့ကို အီရန်က ဒုံးကျည်များ ထောက်ပံ့မှုသည် စစ်ရေးကျူးကျော်ရန်စမှုဟု ဆော်ဒီအိမ်ရှေ့မင်းသား စွပ်စွဲ

အောက်တိုဘာ ၂၄ ရက်က ရီယာ့ဒ်၌ ရင်းနှီးမြှုပ်နှံမှုဆွေးနွေးပွဲတွင် တွေ့ရသော ဆော်ဒီအိမ်ရှေ့မင်းသား မိုဟာမက်ဘင်ဆာမန် (Photo: AFP)

ဆော်ဒီ၏ သြဇာကြီးအိမ်ရှေ့မင်းသား မိုမာမက်ဘင်ဆယ်မန်က ယီမင်ရှိ သူပုန်တို့ကို အီရန်က ဒုံးကျည်များထောက်ပံ့ပေးမှုသည် စစ်ရေးကျူးကျော်ရန်စမှုလုပ်ရပ်ဟု စွပ်စွဲခဲ့ကြောင်း ဆော်ဒီအစိုးရမီဒီယာ SPA က နိုဝင်ဘာ ၇ ရက်တွင် ဖော်ပြခဲ့သည်။

ဗြိတိန်နိုင်ငံခြားရေးဝန်ကြီး ဘောရစ်ဂျွန်ဆင်နှင့် ဖုန်းဆက်စကားပြောဆိုမှုတွင် ဆော်ဒီအိမ်ရှေ့မင်းသား မိုဟာမက်ဘင်ဆယ်မန်က “ဟူသီတွေကို အီရန်ရဲ့ဒုံးထောက်ပံံ့ပေးမှုက အီရန်အစိုးရရဲ့ တိုက်ရိုက်စစ်ရေး ကျူးကျော်ရန်စမှုဖြစ်ပါတယ်” ဟုပြောကြားခဲ့ကြောင်း SPA က ကိုးကားဖော်ပြခဲ့သည်။

အီရန်နိုင်ငံခြားရေးဝန်ကြီး မိုဟာမက်ဂျာဘက်ဇာရစ်သည် ဗြိတိန်နိုင်ငံခြားရေးဝန်ကြီး ဘောရစ်ဂျွန်ဆင်နှင့် တယ်လီဖုန်းပြောဆိုမှုတွင် ဆော်ဒီတာဝန်ရှိသူများ၏ စွပ်စွဲချက်များသည် အရှိတရားနှင့် ဖီလာဆန့်ကျင်ဖြစ်နေပြီး အန္တရာယ်ရှိကြောင်း ပြောကြားခဲ့သည်ဟု အီရန်နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ်က ပြောကြားခဲ့သည်။

ဆွန်နီအုပ်ချုပ်သော ဆော်ဒီအာရေဗျနှင့် ရှီအိုက်လွှမ်းမိုးထားသော အီရန်တို့သည် ယီမင်ပြည်တွင်းစစ်၌ ဆန့်ကျင်ဘက်မှ ပါဝင်နေပြီး တစ်ဖက်နှင့်တစ်ဖက် အပြန်အလှန်စွပ်စွဲနေကြသည်။ အီရန်က ကျောထောက်နောက်ခံပေးထားသော ဟူသီသူပုန်တို့က ဆော်ဒီမြို့တော်ရီယာ့ဒ်ထံ ပစ်ခဲ့သည့် ထိပ်ဖူးတပ်ဒုံးကို ဆော်ဒီက နိုဝင်ဘာ ၄ ရက်တွင် ကြားဖြတ်ပစ်ချခဲ့ကြောင်း ဆော်ဒီအစိုးရက ထုတ်ပြန်ထားသည်။

အပြည်ပြည်ဆိုင်ရာက အသိအမှတ်ပြုထားသည့် ယီမင်အစိုးရကို ဆော်ဒီဦးဆောင်သည့် မဟာမိတ်တို့က ကျောထောက်နောက်ခံပေးထားပြီး ယီမင်၏နယ်မြေအများစုကို သိမ်းပိုက်ထားသော ဟူသီတို့ကို ဝင်ရောက်တိုက်ခိုက်နေသည်။ အီရန်သည် ဟူသီသူပုန်တို့အား ဒုံးများထောက်ပံ့ပေးနေကြောင်း ဆော်ဒီကစွပ်စွဲခဲ့မှုကို အီရန်က ပြင်းပြင်းထန်ထန် ငြင်းဆိုထားပြီး ဆော်ဒီသည် ယီမင်တွင် စစ်ရာဇဝတ်မှုများ ကျူးလွန်နေသည်ဟု ပြန်လည်စွပ်စွဲထားသည်။

ယီမင်ပြည်တွင်းစစ် ပဋိပက္ခတွင် လူ ၁၀၀၀၀ ကျော်သေဆုံးထားပြီး ဒေသတွင်း၌ အဆင်းရဲဆုံး နိုင်ငံတစ်နိုင်ငံဖြစ်သော ယီမင်၌ လူသားချင်းစာနာထောက်ထားမှုဆိုင်ရာ ကပ်ဆိုးကြီးကို ဖြစ်စေခဲ့သည်။

၂၀၁၅ ခုနှစ်ကစပြီး ယီမင်တွင် ဆော်ဒီက စစ်ရေးအရ ဝင်ရောက်စွက်ဖက်ခဲ့ပြီး ကာကွယ်ရေးဝန်ကြီးလည်းဖြစ်သော မင်သားဆယ်မန်သည် ယင်းစွက်ဖက်မှုတွင် အဓိကကျသူဟု ယူဆခံရသည်။

ဟူသီသူပုန်တို့၏ ဒုံးပစ်လွှတ်မှုကို တုံ့ပြန်သည့်အနေဖြင့် ယီမင်၏ဝေဟင်၊ မြေပြင်နှင့် ဆိပ်ကမ်းအားလုံးကို ပိတ်ပင်သွားမည်ဖြစ်ကြောင်း ဆော်ဒီဦးဆောင်သော မဟာမိတ်တို့က နိုဝင်ဘာ ၇ ရက်တွင် ကြေညာခဲ့သည်။

နိုဝင်ဘာ ၄ ရက် ဒုံးပစ်လွှတ်မှုက ဆော်ဒီနှင့် အီရန်ကြား ပဋိပက္ခတွင် တစ်ဆင့်ခံပါဝင်နေမှုအား ပို၍အရှိန်မြှင့်တက်စေနိုင်သည်။