နေပြည်တော် MICC-2 တွင်ပြုလုပ်သည့် e-Government Conference and ICT Exhibition 2017 အခမ်းအနားကို တွေ့ရစဉ်
ရေရှည်တည်တံ့သည့် ဖွံ့ဖြိုးတိုးတက်မှုရရှိရန် e-Government ၏ အခန်းကဏ္ဍသည် အလွန်အရေးကြီးကြောင်း ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသန့်စင်မောင်က ပြောကြားသည်။
နိုဝင်ဘာ ၇ ရက်က နေပြည်တော်ရှိ MICC-2 (မြန်မာအပြည်ပြည်ဆိုင်ရာ ကွန်ဗင်းရှင်းစင်တာ- ၂) တွင်ကျင်းပသည့် e-Government Conference and ICT Exhibition 2017 အခမ်းအနားတွင် ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသန့်စင်မောင်က အဖွင့်အမှာစကား ပြောကြားရာတွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။
“e-Government ကိုဆောင်ရွက်ရတဲ့ ရည်ရွယ်ချက်က အစိုးရနဲ့ ပြည်သူအကြား၊ အစိုးရနဲ့ စီးပွားရေးလုပ်ငန်းများ၊ အစိုးရဌာနအချင်းချင်းအကြား ဆက်ဆံဆောင်ရွက်တဲ့ကိစ္စတွေ လွယ်ကူကောင်းမွန်လာစေဖို့ ဖြစ်ပါတယ်။ ရေရှည်တည်တံ့တဲ့ ဖွံ့ဖြိုးတိုးတက်မှုကိုရရှိဖို့ e-Government ရဲ့အခန်းကဏ္ဍက အလွန်အရေးကြီးပါတယ်။ e-Government ကဏ္ဍတိုးတက်မှုမရှိရင် ပြည့်စုံတဲ့တိုင်းပြည် ဖွံ့ဖြိုးတိုးတက်မှုလည်း မဖြစ်နိုင်ပါဘူး” ဟု ပြည်ထောင်စုဝန်ကြီး ဦးသန့်စင်မောင်က ပြောကြားသည်။
ထို့ပြင် မြန်မာနိုင်ငံ၏ e-Government ဖွံ့ဖြိုးတိုးတက်လာရန် စွမ်းဆောင်ပေးမည့် အဓိကအထောက်အကူပြုသည့် နည်းပညာအသုံးချမှု၊ လုပ်ငန်းဆောင်ရွက်မှု လုပ်ငန်းစဉ်များနှင့် စီမံကိန်းခန့်ခွဲမှုတို့အား ဌာနများမှ ပြန်လည်သုံးသပ်ပြုပြင်ကြရမည်ဖြစ်ပြီး စီမံခန့်ခွဲမှုအပိုင်းသည် အရေးအကြီးဆုံးဖြစ်ကြောင်း ပြည်ထောင်စုဝန်ကြီးက ဆိုသည်။
၎င်း “e-Government လုပ်ငန်းများကို ဦးစီးဦးဆောင်တဲ့နေရာမှာ စနစ်တကျစီမံခန့်ခွဲမှုလိုအပ်ပြီး လက်ရှိဆောင်ရွက်နေတဲ့ လုပ်ငန်းပုံစံတချို့ကိုလည်း ပြန်လည်သုံးသပ်ဖို့ ပိုမိုကောင်းမွန်တဲ့၊ ပိုမိုမြန်ဆန်တဲ့ပုံစံမျိုးကို ပြောင်းလဲဖို့က နည်းပညာထက် အရေးကြီးတယ်ဆိုတာ ပြောကြားချင်ပါတယ်။ နည်းပညာတွေကောင်းပြီး လူတွေကမပြောင်းလဲရင် တိုးတက်မှုရဖို့ဆိုတာ ဘယ်တော့မှဖြစ်လာမှာ မဟုတ်ပါဘူး” ဟု ၎င်းက ဆက်လက်ပြောကြားသည်။
အဆိုပါ ညီလာခံကျင်းပခြင်းသည် အစိုးရ၏ လုပ်ငန်းလုပ်ဆောင်မှုများ လျင်မြန်လာစေရန်၊ လုပ်ငန်းများ ပိုမိုထိရောက်တွင်ကျယ်စေရန်၊ ဝန်ဆောင်မှုပေးရာတွင် တိုးတက်ကောင်းမွန်လာစေရန်၊ ပြည်သူများ၏ လိုအပ်ချက်ကို ဖြည့်ဆည်းပေးရာတွင် ပွင့်လင်းမြင်သာမှုရှိရန်နှင့် လျင်မြန်စွာဆောင်ရွက်ပေးရန်၊ သတင်းအချက်အလက်နှင့် ဆက်သွယ်ရေးနည်းပညာ (ICT) အား အသုံးချရန်လိုအပ်နေသည်ကို အသိအမှတ်ပြုခြင်းအတွက် ကျင်းပခြင်းဖြစ်ကြောင်း သိရသည်။
လက်ရှိမြန်မာနိုင်ငံ၏ e-Government ညွှန်းကိန်းသည် ၂၀၁၆ ခုနှစ်တွင် နိုင်ငံပေါင်း ၁၉၃ နိုင်ငံတွင် ၁၆၉ အဆင့်ရှိကြောင်း သိရသည်။
