လွှတ်အဆောက်အအုံအား ဒရုန်းဖြင့်မှတ်တမ်းယူသည့် တူရကီအခြေစိုက် သတင်းထောက်အပါအဝင် လေးဦးအား နိုဝင်ဘာ ၆ ရက်အထိ ရဲတပ်ဖွဲ့မှ ဆက်လက်စစ်ဆေးနေပြီး သံရုံးမှတစ်ဆင့် မိသားစုဝင်များနှင့် တွေ့ခွင့်ပေးနေကြောင်း ဒုတိယရဲမှူးကြီးရွှေသောင်းက ပြောကြားသည်။
“လက်ရှိအခြေအနေကတော့ စစ်ဆေးနေတုန်းပဲရှိသေးတယ်။ မိသားစုနဲ့မတွေ့ရတာတော့ မဟုတ်ပါဘူး။ သံရုံးတွေကနေတစ်ဆင့်တော့ တွေ့ခွင့်ပြုနေပါတယ်” ဟု ဒုတိယရဲမှူးကြီး ရွှေသောင်းက The Daily Eleven သတင်းစာ၏ မေးမြန်းမှုကို ပြန်လည်ဖြေကြားသည်။
ထို့ပြင် အဆိုပါလေးဦးအား တရားစွဲတင်ခြင်း မရှိသေးသည့်အတွက် ရမည်းသင်းထောင်သို့ ပို့ဆောင်ထားခြင်းမဟုတ်ဘဲ လက်ရှိ နေပြည်တော်တွင်သာထားရှိကြောင်း ဒုရဲမှူးကြီးက ပြောကြားသည်။
သို့ရာတွင် အောင်နိုင်စိုးနှင့် ယာဉ်မောင်း ဦးလှတင်တို့ဘက်မှ ရှေ့နေအဖြစ် လိုက်ပါဆောင်ရွက်ပေးနေသည့် ရှေ့နေဦးခင်မောင်ဇော်က ၎င်းတို့အား ရဲတပ်ဖွဲ့မှ စစ်ဆေးနေဆဲဖြစ်သည့်အတွက် တွေ့ဆုံခွင့်မရရှိသေးကြောင်း ပြောကြားသည်။
“လက်ရှိမှာ အမှုသည်နဲ့ ကျွန်တော်တွေ့ကို မတွေ့ရသေးဘူး။ စစ်ဆေးနေတုန်းမို့လို့ ပြောတယ်။ နောက်ဆုံးအခြေအနေက နိုင်ငံခြားသား နှစ်ယောက်နဲ့ ကျန်တဲ့နှစ်ယောက်ကို အမှုနှစ်ခုခွဲမယ်ဆိုတဲ့ အနေအထားရှိတယ်။ ကျန်တာတွေက အမှုတင်မှသိမှာပါ” ဟု (မြန်မာနိုင်ငံ လွတ်လပ်သောရှေ့နေများအသင်း ဗဟိုအလုပ်အမှုဆောင်ကော်မတီ၊ နေပြည်တော်တာဝန်ခံ) ရှေ့နေဦးခင်မောင်ဇော်က ပြောကြားသည်။
နေပြည်တော်ရှိ လွှတ်တော်အဆောက်အအုံအား အောက်တိုဘာ ၂၇ ရက်က လျှပ်စစ်နှင့် စွမ်းအင်ဝန်ကြီးဌာနရုံးအမှတ် ၂၇ အနီးမှ ဒရုန်းဖြင့် မှတ်တမ်းယူရန် စတင်နေချိန် ပြည်သူ့လွှတ်တော်ဝင်း လုံခြုံရေးတာဝန်ကျ ဝန်ထမ်းတစ်ဦးက တွေ့ရှိသဖြင့် ၎င်းတို့အား အမှတ် (၅) ရဲစခန်းသို့ ခေါ်ယူစစ်ဆေးခဲ့ကြောင်း သိရသည်။
တူရကီနိုင်ငံအခြေစိုက် စင်ကာပူရုံးခွဲ TRT သတင်းဌာနမှ မလေးရှားနိုင်ငံသူ MOK CHOY LIN၊ ပက်စပို့အမှတ် A 39882675 ဗီဇာအမှတ် 079021၊ စင်ကာပူနိုင်ငံသား LAUHON MENG၊ ပတ်စပို့အမှတ် E 5965308A၊ ဗီဇာအမှတ် D 079022၊ စကားပြန် အောင်နိုင်စိုး (ခ) ရာကွတ်နှင့် ယာဉ်မောင်း ဦးလှတင် (ခ) ရှက်ဖီးတို့အား MAVICPRO တံဆိပ်ပါ မီးခိုးရောင်ဒရုန်းနှင့် Remote Control တို့အားတွေ့ရှိခဲ့ကြောင်း ရဲမှတ်တမ်းများအရ သိရသည်။
အဆိုပါလေးဦးအား နမစ (၅) ၄၂/၂၀၁၇ ပို့ကုန် သွင်းကုန် ဥပဒေပုဒ်မ ၈ ဖြင့် နေပြည်တော် ဇမ္ဗူသီရိမြို့နယ် အမှတ် (၁) မြို့မရဲစန်းတွင် အမှုဖွင့်အရေးယူထားပြီး အောက်တိုဘာ ၂၉ ရက်က ဇမ္ဗူသီရိမြို့နယ်တရားရုံးတွင် ရုံးထုတ်ရမန်ယူခဲ့ကြောင်း သိရသည်။
ရဲတပ်ဖွဲ့မှ ကနဦး စစ်ဆေးမေးမြန်းချက်အရ မြန်မာနိုင်ငံ၏ ရှုခင်းများ၊ လှပသော အဆောက်အအုံများ၊ ဘုရားစေတီများနှင့် လွှတ်တော်အဆောက်အအုံတို့အား ရိုက်ခြင်းဖြစ်ကြောင်း ဒေါက်တာအေးမောင်နှင့် မတွေ့ဖြစ်၍ လွှတ်တော်အဆောက်အအုံကိုရိုက်ရန်အတွက် ဒရုန်းလွှတ်တင်စဉ် လှည့်ကင်းအဖွဲ့က စစ်ဆေးခံရခြင်းဖြစ်ကြောင်း စကားပြန် အောင်နိုင်စိုး (ခ) ရာကွတ်က အမှတ် (၅) ရဲစခန်းတွင် ထွက်ဆိုထားသည်။
