မန္တလေးတိုင်းဒေသကြီး သပိတ်ကျင်းမြို့နယ်တွင် ကျောက်တူးနေရာမှ တောင်ကမ်းပါးပြိုကျခဲ့ရာ မြေပိပြီး လူတစ်ဦးသေဆုံးမှု ဖြစ်စဉ်နှင့်ပတ်သက်ပြီး နယ်မြေရဲစခန်း (တကောင်း) မှ အမှုဖွင့်စစ်ဆေးနေကြောင်း သတင်းရရှိသည်။
သပိတ်ကျင်းမြို့နယ် အင်းနက်ကျေးရွာမြောက်ဘက်ရှိ တောင်ခြေတွင် နိုဝင်ဘာ ၅ ရက် ညနေ ၆ နာရီက တောင်ကမ်းပါးပြိုကျမှုကြောင့် အမျိုးသားတစ်ဦးသေဆုံးသည့်ဖြစ်စဉ်နှင့် ပတ်သက်ပြီး သတင်းအရနယ်မြေရဲစခန်း (တကောင်း) မှ ဒုရဲအုပ်ကျော်စွာလင်းနှင့်အဖွဲ့ သက်သေများနှင့်အတူ စစ်ဆေးခဲ့သည်။
စစ်ဆေးချက်အရ သေဆုံးသူသည် ဇော်မင်းအောင် (၂၇ နှစ်)၊ ကျောက်တူးလုပ်သူ သပိတ်ကျင်းမြို့နယ် တောင်သလုံးကျေးရွာနေသူဖြစ်ကြောင်း၊ ၎င်းသည် တောင်ခြေတွင် ကျောက်တူးနေရာမှ တောင်ကမ်းပါးပြိုကျခဲ့ရာ မြေပိပြီး ပြင်ပဒဏ်ရာတစ်စုံတစ်ရာမရှိဘဲ သေဆုံးခဲ့ခြင်းဖြစ်ကြောင်း ဇနီးဖြစ်သူ အသက် ၂၅ နှစ်အရွယ် အမျိုးသမီး၏ပြောပြချက်အရ သိရသည်။
သေဆုံးသူအား တကောင်းဆေးရုံသို့ ပို့အပ်ပြီး နယ်မြေရဲစခန်း (တကောင်း) မှ သေဆုံးမှုဖြစ်စဉ်နှင့်ပတ်သက်ပြီး သေမှုသေခင်းအမှတ်စဉ် ၄/၂၀၁၇ ဖြင့် ကနဦးရေးဖွင့်ကာ ဆက်လက်စစ်ဆေးနေကြောင်း သတင်းရရှိသည်။
