‘Outcome Sharing Seminar 2017 Capacity Building of Industrial Human Resource Development Organization for Productivity Improvement in Myanmar’ အခမ်းအနားတွင် ဒေါက်တာအောင်သိန်းကို တွေ့ရစဉ် (ဓာတ်ပုံ- ဇေယျာငြိမ်း)
မြန်မာနိုင်ငံအနေဖြင့် ASEAN Economic Community (AEC) စတင်ဆောင်ရွက်ချိန်တွင် ဒေသတွင်းနိုင်ငံများ၏ ကုန်ထုတ်လုပ်မှုစွမ်းအားကို ယှဉ်ပြိုင်နိုင်ရန်အတွက် Asia Productivity Organization ၏ အဖွဲ့ ဝင်နိုင်ငံဖြစ်ရေးကို ဆောင်ရွက်နေကြောင်း နိုဝင်ဘာ ၅ ရက်ကပြုလုပ်သည့် ‘Outcome Sharing Seminar 2017 Capacity Building of Industrial Human Resource Development Organization for Productivity Improvement in Myanmar’ တွင် မြန်မာနိုင်ငံ ကုန်သည်စက်မှုအသင်းချုပ် (UMFCCI)၊ တွဲဖက်အထွေထွေ အတွင်းရေးမှူး ဒေါက်တာအောင်သိန်းက ပြောကြားသည်။
“အဓိကရည်ရွယ်ချက်က တစ်နေ့ကျရင် ကျွန်တော်တို့နိုင်ငံမှာ အမျိုးသားအဆင့် ကုန်ထုတ်စွမ်းအားတိုးမြှင့်ရေးစင်တာတစ်ခု ပေါ်ပေါက်လာဖို့။ အဲဒီလိုပေါ်ပေါက်လာပြီးရင် ကျွန်တော်တို့နိုင်ငံသည် အဖွဲ့ဝင်နိုင်ငံအဖြစ်ဝင်နိုင်ရေး ဦးတည်ဆောင်ရွက်လျက် ရှိပါတယ်။ ဘာလို့ ကျွန်တော်တို့အရေးကြီးလဲဆိုရင် အာရှမှာ အာဆီယံအဖွဲ့ဝင်နိုင်ငံတွေထဲက အဖွဲ့ဝင်မဖြစ်သေးတဲ့နိုင်ငံဟာ ကျွန်တော်တို့ မြန်မာနိုင်ငံတစ်နိုင်ငံတည်း ကျန်တော့တာ ဖြစ်ပါတယ်။ ဒါကြောင့်မို့ ကျွန်တော်တို့မကျန်ခဲ့ရေး တခြားသော အာဆီယံနိုင်ငံတွေနည်းတူ ကျွန်တော်တို့နိုင်ငံရဲ့ ကုန်ထုတ်စွမ်းအားတိုးတက်ခြင်းအားဖြင့် ကုန်ထုတ်စွမ်းအား တိုးတက်တယ်ဆိုတာမှာ လူတစ်ဦးချင်းရဲ့ ကုန်ထုတ်စွမ်းအားတိုးတက်ရေးလည်း အရေးကြီးသလို အဖွဲ့အစည်းတစ်ခုချင်းရဲ့ ကုန်ထုတ်စွမ်းအားတိုးတက်ဖို့လည်း အရေးကြီးပြီး တစ်နိုင်ငံလုံးရဲ့ ကုန်ထုတ်စွမ်းအား တိုးတက်မှုလည်း အရေးကြီးပါတယ်” ဟု ဒေါက်တာအောင်သိန်းက ပြောကြားသည်။
မြန်မာနိုင်ငံတွင် National Productivity Organization အဖွဲ့အစည်းများကို ဖွဲ့စည်းဖွဲ့စည်းထားမှသာ အဆိုပါ Asia Productivity Organization ကို ဝင်ရောက်နိုင်မည်ဖြစ်ပြီး လက်ရှိအချိန်တွင် မြန်မာနိုင်ငံ စက်မှုဝန်ကြီးဌာန၏ အကူအညီဖြင့် ကုန်သည်စက်မှုအသင်းချုပ် (UMFCCI) နှင့် Project and Productivity Movement in Japan တို့ပူးပေါင်းကာ ဆောင်ရွက်လျက်ရှိကြောင်း သိရသည်။
