ဝက်စ်ဟမ်းအသင်း နည်းပြ ဘီလစ်ကို ရာထူးမှ ထုတ်ပယ်

Photo: Reuters

ဝက်စ်ဟမ်းအသင်းသည် တန်းဆင်းဇုန်အတွင်းသို့ ကျရောက်ခဲ့ပြီးနောက် နည်းပြ ဘီလစ်ကို ရာထူးမှ ထုတ်ပယ်လိုက်ကြောင်း သိရှိရသည်။

ဝက်စ်ဟမ်းအသင်းသည် ဘီလစ်ကို ၂၀၁၅ ခုနှစ်က (၃)နှစ်စာချုပ်ဖြင့် ခန့်အပ်ခဲ့ခြင်းဖြစ်ပြီး စာချုပ်မပြည့်မီ လမ်းခွဲခဲ့ခြင်းဖြစ်သည်။

ခရိုအေးရှားလက်ရွေးစင်ဟောင်း ဘီလစ်သည် ပထမဆုံးကိုင်တွယ်သည့် ၂၀၁၅-၁၆ ရာသီတွင် ပရီးမီးယားလိဂ်၌ အဆင့်(၇)နေရာရရှိအောင် စွမ်းဆောင်ပေးနိုင်ခဲ့သော်လည်း ၂၀၁၆-၁၇ ရာသီတွင်မူ အဆင့်(၁၁)နေရာသို့ ကျဆင်းခဲ့သည်။

လက်ရှိရာသီတွင် ပိုမိုဆိုးရွားလာခဲ့ပြီး ပွဲစဉ်(၁၁)အပြီး၌ တန်းဆင်းဇုန်အတွင်းသို့ ကျရောက်သွားခဲ့ပြီးနောက် အသင်းတာဝန်ရှိသူများက ရာထူးမှ ထုတ်ပယ်ရန် ဆုံးဖြတ်လိုက်ခြင်းလည်းဖြစ်သည်။

ဝက်စ်ဟမ်းအသင်းက လက်ရှိအချိန်တွင် အပြောင်းအလဲပြုလုပ်ရန် မဖြစ်မနေလိုအပ်နေပြီဟု ယူဆသည့်အတွက် ယခုကဲ့သို့ ဆုံးဖြတ်ခဲ့ခြင်းဖြစ်ကြောင်း၊ နည်းပြ ဘီလစ်နှင့် မိမိတို့ လမ်းခွဲလိုက်ပြီဟု အတည်ပြုကြောင်း အသင်းဝက်ဘ်ဆိုက်မှတစ်ဆင့် ထုတ်ပြန်ကြေညာခဲ့သည်။

ဝက်စ်ဟမ်းအသင်းသည် နည်းပြသစ်အဖြစ် အဲဗာတန်နှင့် မန်ယူနည်းပြဟောင်း ဒေးဗစ်မွိုက်စ်ကို ခန့်အပ်ရန် စီစဉ်နေပြီး ရေရှည်စာချုပ်မချုပ်ဆိုမီ ရာသီကုန်အထိ ယာယီသဘော စမ်းသပ်ခန့်အပ်သွားဖွယ်ရှိနေကြောင်း ဗြိတိန်မီဒီယာအချို့က သုံးသပ်လျက်ရှိသည်။