ဖြုတ်ထုတ်သန့်စင်မှုအတွင်း အဖမ်းခံရသည်ဟု သတင်းထွက်နေသော နာမည်ကျော် ဘီလျံနာ ဆော်ဒီမင်းသား အယ်ဝါလိဒ်ဘင်တာလယ်အား ဖေဖော်ဝါရီ ၁၈ ရက်က ရီယက်တွင် ကျင်းပခဲ့သော ယဉ်ကျေးမှုဆိုင်ရာပွဲတော်တစ်ခုအတွင်း တွေ့ရစဉ် (Photo: AFP)

ဆော်ဒီအာရေဗျနိုင်ငံတွင် ထင်ရှားသည့် ဘီလျံနာမင်းသားတစ်ဦး အပါအဝင် မင်းသား ၁၁ ဦးနှင့် တာဝန်ထမ်းဆောင်ဆဲ ဝန်ကြီးနှင့် ဝန်ကြီးဟောင်းဒါဇင်များစွာ ဖမ်းဆီးခံခဲ့ရသည်ဟု သတင်းများတွင် ဖော်ပြခဲ့သည်။ ဆော်ဒီဘုရင်နိုင်ငံ၏ ငယ်ရွယ်သော အိမ်ရှေ့မင်းသားသည် အာဏာကိုပိုမိုချုပ်ကိုင်လာစဉ် ယခုကဲ့သို့ သိမ်းကျုံးနှိမ်နင်းမှုကြီးတစ်ခု ထွက်ပေါ်လာခြင်းဖြစ်သည်။

ထို့ပြင် ဆော်ဒီတစ်နိုင်ငံလုံးကို ထိတ်လန့်တုန်လှုပ်စေသည့် ရာထူးကြီးပုဂ္ဂိုလ်များ ဆက်တိုက်ဖြုတ်ချခံရမှုများထဲ၌ ဆော်ဒီ အမျိုးသားအစောင့်တပ်ဖွဲ့၏အကြီးအကဲဖြစ်ပြီး ထီးနန်းဆက်ခံသူဖြစ်လာနိုင်သည်ဟု တစ်ချိန်က ယူဆခံခဲ့ရသော မင်းသား မီတေ့ဘင် အဗ္ဗဒူလာသည်လည်း နောက်ဆုံးတစ်ဦးအနေနှင့် ပါဝင်သွားခဲ့သည်။

နိုဝင်ဘာ ၄ ရက်နှောင်းပိုင်းက  သြဇာကြီး အိမ်ရှေ့မင်းသား မိုဟာမက်ဘင်ဆယ်မန် ဦးဆောင်သော ခြစားမှုနှိမ်နင်းရေးကော်မရှင်သစ်တစ်ခုကို ဖွဲ့စည်းလိုက်ကြောင်း တော်ဝင် အမိန့်စာတစ်ခုထွက်လာပြီး ချက်ချင်းမှာပင် ယခုကဲ့သို့ နှိမ်နင်းမှုများ ဆက်လက်ထွက်ပေါ်လာခြင်းဖြစ်သည်။

ထိုကော်မရှင်သည် ၂၀၀၉ ခုနှစ်က ပင်လယ်နီမြို့ ဂျက်ဒါကို အကြီးအကျယ်ပျက်စီးစေခဲ့သည့် ရေကြီးမှုကြီးများ အစရှိသည့်  ဖြစ်စဉ်အဟောင်းများကို ပြန်လည်စစ်ဆေးမှုပြုလုပ်နေစဉ် မင်းသားများနှင့်အတူ လက်ရှိတာ ဝန်ထမ်းဆောင်ဆဲဝန်ကြီးလေးဦးနှင့် ဝန်ကြီးဟောင်း ဒါဇင်ပေါင်းများစွာကို ဖမ်းဆီးခဲ့ခြင်း ဖြစ်သည်ဟု အစိုးရပိုင်ရုပ်သံ Al Arabiya တွင် ဖော်ပြခဲ့သည်။ ထိုကော်မရှင်၏ ရည်မှန်းချက်မှာ ပြည်သူ့ငွေများကိုထိန်းသိမ်းရန်၊ အကျင့်ပျက်ခြစားသူများနှင့် ရာထူးများကို အသုံးချပြီး ကိုယ်ကျိုးရှာသူများအား အပြစ်ပေးရန်အတွက်ဖြစ်ကြောင်း အစိုးရပိုင် Saudi Press သတင်းဌာန၌ ဖော်ပြခဲ့သည်။

ဆော်ဒီ သတင်းဝက်ဆိုက်များ၌ ဖော်ပြချက်အရ ယခုဖမ်းဆီးခံရသူများထဲတွင် ဆော်ဒီ ဘီလျံနာမင်းသား အယ်ဝါလိဒ်ဘင်တာလယ် ပါဝင်သည်ဟု သိရသော်လည်း အစိုးရထံမှ တရားဝင်အတည်ပြုချက် ထွက်မလာသေးပေ။ သို့သော် ၎င်းပိုင်ဆိုင်သော Kindom ဦးပိုင်လုပ်ငန်း၏ရှယ်ယာများသည် ၉ ဒသမ ၉ ရာခိုင်နှုန်း ထိုးဆင်းသွားခဲ့သည်။

လေကြောင်း သတင်းရင်းမြစ်များ၏ ပြောကြားချက်အရ နာမည်ကြီးပုဂ္ဂိုလ်များ ထွက်ပြေးတိမ်းရှောင်သွားခြင်းကို တားဆီးရန်အတွက် ဂျက်ဒါမြို့ထဲတွင် ပုဂ္ဂလိကသုံး ဂျက်လေယာဉ်များကို ပျံတက်ခွင့် ပိတ်ထားသည်ဟု သိရသည်။ ထိုစဉ် ဆော်ဒီထီးနန်း၏ ဘာသာရေးခေါင်းဆောင်များ ထိပ်ပိုင်းကောင်စီက ခြစားမှုတိုက်ဖျက်ရေးသည် အကြမ်းဖက်မှု တိုက်ဖျက်ရေးကဲ့သို့ပင် အရေးကြီးကြောင်း Twitter ပေါ်၌ ရေးသားခဲ့ပြီး မဖြစ်မနေလိုအပ်သည့် ဘာသာရေးဘက်မှ ထောက်ခံမှု ပေးသည့်အကြောင်းကို ပြသခဲ့သည်။

“အခု ဖမ်းဆီးမှုတွေရဲ့ အတိုင်းအတာ ပမာဏဟာ ခေတ်သစ်ဆော်ဒီသမိုင်းမှာ မကြုံစဖူးဖြစ်ဖွယ်ရှိပါတယ်”ဟု Rice တက္ကသိုလ်မှ ပြည်သူ့မူဝါဒရေးရာ Baker အင်စတီကျုမှ ခရစ်စတီယန်အူရစ်ချ်ဆန်က ပြောကြားခဲ့သည်။ “မင်းသား အယ်ဝါလိဒ်ဘင်တာလယ် ဖမ်းခံရတဲ့ သတင်းသာ မှန်မယ်ဆိုရင် ပြည်တွင်းရော၊ နိုင်ငံတကာစီးပွားရေး အသိုင်းအဝိုင်းအတွက် ထိတ်လန့်စရာတွေဖြစ်ကုန်ပါလိမ့်မယ်”ဟု အူရစ်ချ်ဆန်က ပြောကြားခဲ့သည်။

■ ပိုမိုကျယ်ပြန့်လာသည့် နှိမ်နင်းမှုများ

ယခုနှိမ်နင်းမှုကြီးမတိုင်မီ လွန်ခဲ့သည့် သီတင်းနှစ်ပတ်ခန့်က မင်းသားမိုဟာမက်ဘင်ဆယ်မန်သည် ရေနံခေတ်လွန်ကာလအတွက် ၎င်း၏ စီးပွားရေးပြုပြင်ပြောင်းလဲမှုကို ပွဲထုတ်သည့်အနေနှင့် ရီယက်တွင်ကျင်းပသော ရင်းနှီးမြှုပ်နှံမှု ထိပ်သီးအစည်းအဝေးပွဲတစ်ခုသို့ ကမ္ဘာတစ်ဝန်းမှ စီးပွားရေးလုပ်ငန်းရှင်ထောင်ပေါင်းများစွာကို ဖိတ်ခေါ်ခဲ့သည်။ ယင်းမတိုင်မီ စက်တင်ဘာလက MBS ဟု ခေါ်ကြ သော အသက် ၃၂ နှစ်အရွယ် မင်းသား မိုဟာမက်ဘင်ဆယ်မန်သည် သြဇာကြီး ဘာသာရေး ခေါင်းဆောင်များနှင့် တက်ကြွ လှုပ်ရှားသူများကို ဆက်တိုက်ဖမ်းဆီးမှုများ လုပ်ခဲ့သေးသည်။

လေ့လာသူများ၏ ပြောကြားချက်အရ အဖမ်းခံရသူအများအပြားသည် အိမ်နီးချင်း ကာတာကို သပိတ်မှောက်ရေးအပါအဝင် မင်းသားမိုဟာမက်၏ ရန်လိုသော နိုင်ငံခြား ရေးမူဝါဒများ၊ ထောက်ပံ့ကြေးများလျှော့ချခြင်း၊ အစိုးရပိုင်ဆိုင်မှုများကို ပုဂ္ဂလိကလက်သို့ လွှဲပေးခြင်း အစရှိသည့် မူဝါဒများနှင့်ပတ်သက်၍ ဆန့်ကျင်သူများဟု သိရသည်။

သို့သော် တစ်ချိန်တည်းမှာပင် မင်းသား မိုဟာမက်သည် အလွန်ရှေးရိုးစွဲသည့် ဆော်ဒီတွင် ၎င်းကိုယ်ကို အတွေးအခေါ်သစ်များကို လက်ခံသည့် ပြုပြင်ပြောင်းလဲရေးသမားတစ်ဦးအနေနှင့် အမျိုးသမီးများကို ယာဉ်မောင်းခွင့်ပေးခြင်း အပါအဝင် ထင်ရှားသော ပြောင်းလဲမှုများကိုလည်း ဆက်တိုက်လုပ်ဆောင်ခဲ့သည်။

နိုင်ငံခြားသံတမန်များကမူ မင်းသား မိုဟာမက်သည် ရာစုနှစ်ဝက်ပင်မရှိသည့် ကာလအတွင်း ဆော်ဒီနိုင်ငံကို ကောင်းစွာ ထိန်းချုပ်သွားနိုင်လိမ့်မည်ဟု ခန့်မှန်းနေကြသည်။