ဝက်စ်ဟမ်းအသင်း၏ ပေါ်တူဂီလက်ရွေးစင်နောက်ခံလူ ဖွန်တေက သူ့ အနေဖြင့် ၂၀၁၇ ခုနှစ်အတွင်း အသင်း၌ ပြန်လည်ပါဝင်ကစားနိုင်မည်မဟုတ် ကြောင်း အတည်ပြုခဲ့သည်။ ဖွန်တေ (၃၃ နှစ်) သည် ပြီးခဲ့သည့်တစ်ပတ်က ကစားခဲ့သော ခရစ္စတယ်ပဲလေ့စ်(၂-၂)ဝက်စ်ဟမ်းပွဲစဉ်တွင် ဒဏ်ရာရရှိခဲ့ပြီး ဆေးဝါးကုသမှုခံနေရသူဖြစ်သည်။
ပြီးခဲ့သည့်စနေနေ့က ဝက်စ်ဟမ်းနှင့် လီဗာပူးလ်တို့ ကစားခဲ့သောပွဲမတိုင်မီ ဖွန်တေက သူ၏ Instagram စာမျက်နှာ၌ သူ၏ဒဏ်ရာမှာ (၂)လ (၃)လခန့် အနားယူရမည်ဖြစ်၍ ယခုနှစ်အတွင်း အသင်း၌ ပြန်ကစားနိုင်မည်မဟုတ်ကြောင်း ရေးသားခဲ့သည်။
ဖွန်တေသည် ဝက်စ်ဟမ်း အသင်းသို့ ၂၀၁၇ ဇန်နဝါရီတွင် ရောက်ရှိလာသူဖြစ်ပြီး အသင်းအတွက် ပရီးမီးယားလိဂ်(၂၄)ပွဲကစားပေးထားသူဖြစ်သည်။