စွန့်ပစ်ထားသော ကျည်ဆန်များကို တွေ့ရစဉ်
ဝမ်းတွင်းမြို့မဈေးအရှေ့ဘက် ရန်ကုန်-မန္တလေးလမ်းဟောင်း မိုင်တိုင်အမှတ် ၃၅၇ မိုင် ခုနစ်ဖာလုံအကျော်၌ လမ်းနံဘေးမြက်ခင်းပေါ်တွင် ကျည်ဆန်များတွေ့ရှိခဲ့သဖြင့် သိမ်းဆည်းခဲ့ကြောင်း သိရသည်။
နိုဝင်ဘာ ၃ ရက်မွန်းလွဲပိုင်းက ဝမ်းတွင်းမြို့ အောင်မင်္ဂလာရပ်ကွက်နေ မောင်စန်းနိုင် (၁၃ နှစ်)၊ အောင်ပြည့်စုံ (၉ နှစ်) တို့သည် သူငယ်ချင်းများနှင့်အတူ မြောင်းနံဘေးငါးရှာနေစဉ် ဝမ်းတွင်းမြို့ အမှတ် (၂) ရပ်ကွက် မြို့မဈေးအရှေ့ဘက် ရန်ကုန်-မန္တလေးလမ်းဟောင်း မြက်ခင်းပေါ်တွင် ကျည်ဆန်များတွေ့ရှိခဲ့သဖြင့် သက်ဆိုင်ရာသို့ သတင်းပို့ခဲ့ရာ ဝမ်းတွင်းမြို့မရဲစခန်းမှူး ရဲအုပ်မြင့်သန်းနှင့်အဖွဲ့က သက်သေများနှင့်အတူ သွားရောက်စစ်ဆေးခဲ့ရာ TAM rolling Bering in China စာတန်းပါ စက္ကူဘူးဖြင့် ထည့်ထားသော ဒသမ (၃၈) ဗို့ ကျည်အတောင့် ၂၀၊ Winthesterusa စာတန်းပါ စက္ကူဖြင့်ထည့်ထားသော ဒသမ (၃၂) ဗို့၊ ကျည်အတောင့် ၅၀၊ Super X 22 rong rifle စာတန်းပါစက္ကူဘူးဖြင့် ထည့်ထားသော ကျည် ၇၇ တောင့်၊ စုစုပေါင်း ကျည် ၁၄၇ တောင့်တို့အား သိမ်းဆည်းရမိခဲ့ကြောင်း သိရသည်။
“ကျည်ဆန်က အဟောင်းတော့ အဟောင်းတွေပါ။ ကလေးတွေက မြောင်းတွေမှာ ငါးဖမ်းရင်းနဲ့ ဘေးနားက မြက်ခင်းထဲကတွေ့တာ။ ဒီနေရာက ရန်ကုန်-မန္တလေးလမ်းဟောင်းဆိုတော့ ကားတွေဖြတ်သန်းသွားလာနေတဲ့နေရာပါ။ လက်နက်ငယ်တွေမှာသုံးတဲ့ ကျည်ဆန်တွေပါ၊ ကျွန်တော်တို့ကတော့ လက်နက်ခဲယမ်းကိစ္စတွေကျတော့ သက်ဆိုင်ရာစစ်တပ်ကို အပ်နှံရတယ်။ အခြားတော့ ဖြည့်စွက်ပြောစရာ ထူးထူးခြားခြားမရှိပါဘူး” ဟု ဝမ်းတွင်းမြို့မရဲစခန်းမှူး ရဲအုပ်မြင့်သန်းက ပြောကြားသည်။
