ဇိုမီးမျိုးနွယ်စုတို့၏ ကောက်သစ်စားပွဲတော် ကျင်းပစဉ်
ချင်းပြည်နယ် တီးတိန်မြို့နယ် ဆိုင်းဇန်ကျေးရွာတွင် ဇိုမီးမျိုးနွယ်စုတို့၏ ကောက်သစ်စားပွဲတော် (ခေါ်) ခွာဒိုပွဲတော် နိုဝင်ဘာ ၃ ရက်နှင့် နိုဝင်ဘာ ၄ ရက်၌ ကျင်းပခဲ့ကြောင်း သိရသည်။
အဆိုပါပွဲတော်တွင် ပျားဖွပ်ခြင်း၊ ရိုးရာအက ကပြခြင်း၊ ဖွပ်လာသည့်ပျားအုံကို ရွာရှိနိမိတ်ဖတ်ဆရာက ရွာ၏ရှေ့ဖြစ်မည့်အရေး ပျားအုံကြည့် နိမိတ်ဖတ်ခြင်း ရွာရှိနတ်ဆိုးများကို နှင်ထုတ်ခြင်း၊ စုပေါင်းစားသောက်ခြင်း စသည့်ရိုးရာဓလေ့များ ပြုလုပ်ခဲ့ကြသည်။
ခွာဒိုပွဲတော်သို့ ချင်းပြည်နယ်ဝန်ကြီးချုပ် ဆလိုင်းလျံလွယ်နှင့် ပြည်နယ်အဆင့်အစိုးရဝန်ကြီးများ၊ ဟိုတယ်နှင့် ခရီးသွားလာရေးဝန်ကြီးဌာန ပြည်ထောင်စုဝန်ကြီး ဦးအုန်းမောင်နှင့် အစိုးရအဖွဲ့ဝင်များ တက်ရောက်ခဲ့သည်။
“တစ်နှစ်ထက်တစ်နှစ် မနှစ်ကထက်စာရင် ဒီနှစ်က ပိုပြီးခမ်းခမ်းနားနား လုပ်နိုင်တယ်။ သို့သော်လည်း ပွဲကျင်းပတိုင်းမှာ ဒီထက်ပိုပြီး တိကျတဲ့အစီအစဉ်တွေ ဖြစ်သင့်တယ်။ နောက်တစ်ခုက ရိုးရာအစားအစာနဲ့ ပတ်သက်ပြီးတော့ ယခုထက်ပိုပြီးတော့ တီထွင်ဖော်ထုတ်ဖို့လိုမယ်။ ရိုးရာအဝတ်အစားကို အနောက်တိုင်းပုံစံဘက် ဆန်းသစ်လာတာထက်စာရင် မူလရှေးချင်းရိုးရာပုံစံတွေ ဖော်ထုတ်စေချင်တယ်။ အခုတော့ ဆန်းသစ်လာတော့ မူလရဲ့ရိုးရာအမှတ်အသားတွေ ပျက်စီးသွားတယ်။ ရိုးရာမူလအမှတ်အသားတွေ ပျက်စီးသွားမှာစိုးရတယ်။ အနောက်တိုင်းပုံစံဘက်ကိုယူပြီး ချုပ်လိုက်တော့ မူလချင်းရိုးရာကို ပျောက်ကွယ်စေပါတယ်။ နဂိုမူလ ချင်းရိုးရာစစ်စစ်ကို ပြန်လည်ဖော်ထုတ်ဖို့သင့်ပါတယ်” ဟု ဖလမ်းခရိုင်အုပ်ချုပ်ရေးမှူး ဦးမိုးဇော်စိုးက ပြောကြားသည်။
“ရိုးရာအကနဲ့ပတ်သက်ပြီးတော့ ပြောရမယ်ဆိုရင် ဘာပဲပြောပြော ယဉ်ကျေးမှုတွေက ပြောင်းလာတော့ ရိုးရာအကမှာ ဆန်းသစ်တီထွင်တာတွေ ဖြစ်စေချင်တယ်။ လူအများ စိတ်ဝင်စားစေဖို့ပေါ့။ ဥပမာ ဝိုင်းဖွဲ့အကလိုမျိုး သီချင်းကမပြောင်းပေမယ့် အကကွက် ဆန်းသစ်တီထွင်စေချင်ပါတယ်။ ဒါမှယဉ်ကျေးမှုသည် နဂိုအတိုင်းဆိုပေမယ့် ခေတ်နဲ့လျော်ညီတဲ့ ဆန်းသစ်တီထွင်မှုတွေ ဖြစ်လာစေချင်တယ်။ ခွာဒိုဆိုတာကတော့ နှစ်စဉ်နှစ်တိုင်း ကျင်းပတယ်။ ကျင်းပတော့ ငွေကျေးကုန်ကျမှုတွေ ပါလာတယ်။ စပွန်ဆာကို ဆိုလိုတာမဟုတ်ဘူး။ လုပ်တဲ့သူတွေက ငွေကြေးကုန်ကျမှုတွေမခံနိုင်တော့ ရိုးရာပွဲတွေက ဖလမ်းခရိုင်အတွင်းမှာ ပျောက်ကွယ်လာတာ တွေ့ရပါတယ်။ ဆိုလိုတဲ့သဘောက ကောက်သစ်စားပွဲဆိုတာ တစ်နှစ်မှတစ်ကြိမ် လုပ်ရတဲ့သဘောလေ။ ရွာတွေမှာ မတွေ့ရသလောက် ဖြစ်လာပြီ။ ငွေကြေးကုန်ကျမှုတွေများလာလို့ အဲဒါတွေကို ဘယ်လိုဖြေရှင်းမလဲ။ ဥပမာ ကနေ့ကောက်သစ်စားမယ့်ဟာတွေ လက်ဆောင်ပေးတာတို့၊ ဧည့်ခံကျွေးမွေးတာတို့ လျှော့ပြီးတော့ ကိုယ်ဆီကနေပြီး ဆန်ဆိုရင် တစ်အိမ်ကို ဘယ်လောက်ထည့်ပေါ့။ အညာဘက် စုပေါင်းအလှူလုပ်သလိုပေါ့။ ရွာသားတွေ ပူးပေါင်းပါဝင်မှု တက်ရောက်တဲ့သူတွေကလည်း သူတို့ဧည့်ခံတဲ့အပိုင်းကိုပဲ လက်ခံဖို့ပေါ့။ မဟုတ်ဘူးဆိုရင် ကုန်ကျစရိတ်များလာတဲ့အတွက် ရိုးရာပွဲတွေကို ရှောင်ရှောင်လာပြီးတော့ ပျောက်ကွယ်လာနိုင်ပါတယ်” ဟု ၎င်းက ဆက်လက်ပြောကြားသည်။
ခွါဒိုပွဲတော်နှင့်ပတ်သက်၍ ဇိုမီးတိုင်းရင်းသားတစ်ဦးက “ခွာ” (Chua) ရဲ့အဓိပ္ပာယ်က ရှေးအခါ ချင်းလူမျိုးတို့ဟာ စကြဝဠာတစ်ခုလုံးကို ကောင်းကင်ဘုံ၊ လူ့ဘုံနှင့် မြေအောက်ဘုံဟူ၍ ဘုံသုံးဘုံအနက် လူ့ကမ္ဘာ့ဘုံကို လူ့ပြည်လူ့ရွာ (Chua) ဟုခေါ်တယ်လို့ သိရပါတယ်။ အဲဒီလူ့ကမ္ဘာဘုံ (ခွာ) ကို နတ်ကောင်းနတ်မြတ်များနဲ့ ကွယ်လွန်သူဘိုးဘွားများရဲ့ ဝိညာဉ်များက ထိန်းသိမ်းစောင့်ရှောက်ခဲ့တယ်လို့ ယုံကြည်ပါတယ်။ ‘ဒို’ (DO) ၏အဓိပ္ပာယ်မှာ နှစ်မျိုးရှိတယ်လို့ သိရပါတယ်။ ပထမ ‘ဒို’ ၏အဓိပ္ပာယ်မှာ တစ်ဦးနှင့်တစ်ဦး ဖော်ရွေစွာဧည့်ဝတ်ပြုခြင်း၊ ကျွေးမွေးဧည့်ခံခြင်း၊ ပြုစုစောင့်ရှောက်ခြင်းလို့ အဓိပ္ပာယ်ရပြီး နောက်တစ်ခုမှာ တိုက်ခိုက်ခြင်း၊ နှင်ထုတ်ခြင်း၊ ချေမှုန်းခြင်းဟု အဓိပ္ပာယ်ရပါတယ်။ ဒါ့ကြောင့် ခွာဒိုပွဲတော်ရဲ့ အဓိပ္ပာယ်ဆိုလိုရင်းက တောင်ယာသီးနှံများ အောင်မြင်စွာ ရိတ်သိမ်းတဲ့ အထိမ်းအမှတ်ပွဲ၊ ကောက်သစ်စားပွဲ ကျင်းပကာ နှစ်သစ်အတွက် ဘိုးဘေးတို့ရဲ့ဝိညာဉ်များနဲ့ နတ်ကောင်းနတ်မြတ်များ ပူဇော်ပသပွဲ၊ ဆုတောင်းမေတ္တာပို့ခြင်း၊ ဆုမွန်ကောင်းတောင်းခြင်း၊ ကျေးဇူးတော်ချီးမွမ်းခြင်းနဲ့ ရပ်ရွာထဲမှ နတ်ဆိုးများ နှင်ထုတ်ချေမှုန်းသည့်ပွဲတော် ဖြစ်ပါတယ်” ဟုပြောကြားသည်။
