အင်ဒိုနီးရှားရှိ ဝေးလံသော တောကြီးမျက်မည်းများတွင် ရှာဖွေတွေ့ရှိခဲ့သည့် အော်ရန်အူတန် လူဝံမျိုးစိတ် အသစ်သည် ကမ္ဘာတွင် မျိုးသုဉ်းပျောက်ကွယ်ရန် အန္တရာယ်အရှိဆုံး လူဝံ ဖြစ်လာသည်ဟု သုတေသန ပညာရှင်များက နိုဝင်ဘာ ၂ ရက်တွင် ပြောကြားခဲ့သည်။

“ဒါဟာ နှစ် ၁၀၀ ခန့်အတွင်းမှာ ပထမဆုံး ထုတ်ပြန်ခဲ့တဲ့ လူဝံမျိုးစိတ် အသစ်တစ်ခုပါ” ဟု ဆူမတ်တြား အော်ရန်အူတန် လူဝံထိန်းသိမ်းစောင့်ရှောက်ရေး အစီအစဉ်၏ ညွှန်ကြားရေးမှူးနှင့် လေ့လာမှုကို ပူးတွဲရေးသားခဲ့သည့် သုတေသနပညာရှင် အီရန်ဆင်လက်တန်က ပြောကြားခဲ့သည်။

Tapanuli အော်ရန်အူတန် လူဝံဟု ခေါ်ဆိုသည့် ယင်းမျိုးစိတ်သည် ဆူမတ်တြားကျွန်းရှိ ဘာတန်တိုရူ သစ်တောတွင် နေထိုင်ပြီး စုစုပေါင်း ကောင်ရေ ၈၀၀ ခန့်သာ ရှိသောကြောင့် ကမ္ဘာတွင် မျိုးသုဉ်းပျောက်ကွယ်ရန် အန္တရာယ်အကြီးဆုံး လူဝံဖြစ်လာကြောင်း ၎င်းက ပြောကြားခဲ့သည်။

အစောပိုင်းတွင် သိပ္ပံပညာရှင်များက အင်ဒိုနီးရှားတွင် ရှိရင်းစွဲ အော်ရန်အူတန် လူဝံမျိုးစိတ် နှစ်မျိုးဖြစ်သော Bornean နှင့် Sumatran သာ ရှိသည်ဟု ယူဆခဲ့သည်။ သို့သော် ၁၉၉၇ ခုနှစ်တွင် သြစတြေးလျ အမျိုးသားတက္ကသိုလ်မှ သုတေသန ပညာရှင်များက ဆူမတ်တြား အော်ရန်အူတန် လူဝံများ နေထိုင်သည်ဟု သိရှိသောနေရာ၏ တောင်ဘက်ရှိ ဘာတန်တိုရူသစ်တောတွင် သီးသန့်ရှိနေသော လူဝံများကို ရှာဖွေတွေ့ရှိခဲ့ခြင်းဖြစ်သည်။

Ref: AFP