ဂျော့ကလူနီက အာဖရိကတွင် ခြစားမှုတိုက်ဖျက်ရေးအတွက် ဒေါ်လာတစ်သန်း လှူဒါန်း

ဟောလိဝုဒ် ဝါရင့်သရုပ်ဆောင် ဂျော့ကလူနီက အာဖရိကတွင် ခြစားမှုနှင့် စစ်ရာဇဝတ်မှု ကျူးလွန်မှုများကို တိုက်ဖျက်ချေမှုန်းရန်အတွက် ဒေါ်လာတစ်သန်း လှူဒါန်းခဲ့သည်။

အာဖရိကတွင် ဖြစ်ပွားနေသည့် ပဋိပက္ခများနောက်ကွယ်မှ ငွေကြေးဆိုင်ရာ ကွန်ရက်များကို ဖော်ထုတ်ရန် စုံစမ်းစစ်ဆေးရေးအဖွဲ့ The Sentry သို့ ငွေကြေးလှူဒါန်းခဲ့သည်ဟု Clooney Foundation for Justice က အောက်တိုဘာ ၂၅ ရက်တွင် ထုတ်ပြန်ခဲ့သည်။

ယင်းငွေများကို စစ်ကြောင့်ပျက်စီးနေသည့် တောင်ဆူဒန်၊ ဆူဒန်၊ ကွန်ဂို၊ ဆိုမာလီယာနှင့် ဗဟိုအာဖရိကနိုင်ငံတို့တွင် တရားမဝင် ငွေကြေးစီးဆင်းမှုနှင့် ခြစားမှုနှင့်ပတ်သက်သည့် အစီရင်ခံစာများအတွက် ရန်ပုံငွေထောက်ပံ့ပေးမည်ဟု The Sentry က ထုတ်ပြန်ခဲ့သည်။

ကလူနီ၏ ထောက်ပံ့မှုနှင့်အတူ သရုပ်ဆောင် Don Cheadle နှင့် အခြားအလှူရှင်များထံမှ ရန်ပုံငွေ စုစုပေါင်းဒေါ်လာ ၃ ဒသမ ၄၅ သန်း ရရှိခဲ့သည်ဟု The Sentry က ထုတ်ပြန်ခဲ့သည်။

မူဝါဒရေးရာ လေ့လာသုံးသပ်သူများ၊ ဒေသဆိုင်ရာ ကျွမ်းကျင်ပညာရှင်များနှင့် ငွေကြေးဆိုင်ရာ မှုခင်းစုံစမ်းစစ်ဆေးရေးများ ပါဝင်သည့် The Sentry အဖွဲ့ကို ဂျော့ကလူနီနှင့် လူ့အခွင့်အရေး တက်ကြွလှုပ်ရှားသူ John Prendergast တို့က ၂၀၁၅ ခု နှစ်တွင် ထူထောင်ခဲ့သည်။

ဂျော့ကလူနီနှင့်ဇနီး အမယ်ကလူနီတို့သည် အမေရိကန်တွင် အမုန်းတရားလှုံ့ဆော်သည့် အဖွဲ့များကို နှိမ်နင်းမှုတွင် ပါဝင်ခဲ့ပြီး ယင်းအဖွဲ့များကို နှိမ်နင်းမှုအစီအစဉ်အတွက် Clooney Foundation for Justice ဖောင်ဒေးရှင်းမှတစ်ဆင့် Southern Poverty Law Center (SPLC) သို့ ဒေါ်လာတစ်သန်း လှူဒါန်းခဲ့သည်။ အသက် ၅၆ နှစ်အရွယ်ရှိ ကလူနီသည် ဒါဖာပဋိပက္ခအတွက် ဆုံးဖြတ်ချက်ရှာဖွေမှုတွင် ထောက်ခံခဲ့မှု၊ ၂၀၁၀ ပြည့်နှစ် ဟေတီငလျင်အတွက် ရန်ပုံငွေကောက်ခံပေးမှု အပါအဝင် လူသားချင်းစာနာထောက်ထားမှုများစွာကို လုပ်ဆောင်ခဲ့သည်။ ၎င်းသည် နိုင်ငံခြားဆက်ဆံရေးကောင်စီ၏ အဖွဲ့ဝင်တစ်ဦးလည်းဖြစ်သည်။