ဖမ်းဆီးခံတောင်သူများ ပြန်လွှတ်ပေးရေးနှင့် မတရားစွပ်စွဲတရားစွဲနေမှုများ ရပ်တန့်ရေး ကျေးရွာပေါင်း ၂၀ ကျော်မှ တောင်သူ ၃၀၀ ကျော် ပြင်ဦးလွင်မြို့အတွင်း အောက်တိုဘာ ၂၃ ရက်က လှည့်လည်ဆန္ဒထုတ်ဖော်စဉ် (ဓာတ်ပုံ-မင်းသန့်)

အဲဒီနေ့က မိုးကအဆက်မပြတ်ရွာနေသည်။ သူ့ဇနီးသည်ကတော့ ‘စနေမိုး’ ဟူ၍ ကြာရှည်ရွာတတ်သည်ဟု သူ့ကိုထောက်ပြပြောဆိုသည်။ ဘယ်နေ့ရွာရွာ မိုးကမိုးပါပဲဟု သူကပြန်ပြောသည်။ တကယ်တော့ အချိန်အခါမဟုတ် ရွာသောမိုးမှန်း သူတို့သိနေကြသည်။ အချိန်အခါဟူသောစကားပင် တစ်စတစ်စ အားပျော့လာသည်ကို သူသတိတော့ထားမိနေသည်။

အခုပဲ သူတို့လယ်မြေကွက်တွေကို ကြည့်ရင်း သူတစ်စုံတစ်ရာကို နာကျင်နေမိသည်။ ရေတွေဖွေးနေသော လယ်မြေတွေထဲမှာ ဘာစပါးပင်၏ အရိပ်အခြေကိုမျှမမြင်ရ။ လေအတိုး မိုးအရွာနှင့် လယ်ယာထဲကထနေသော လှိုင်းတွေကို မြစ်ကြီးတစ်မြစ်အမြင် မြင်ယောင်ကြည့်နေမိသည်။ ထိုလှိုင်းတွေက သူတို့အိမ်အောက်ကြမ်းခင်းကို လာရိုက်ခတ်နေသည်။ ဝါးထရံကြမ်းခင်း၏ လစ်ဟာနေသော အကွက်လေးတွေထဲမှ ရေမြုပ်လေးတွေက သူတို့တဲအိမ်လေးကို စိုထိုင်းစေတော့သည်။ သူတို့အသက်ရှူသံတွေကို စိုထိုင်းစေတော့သည်။ သူတို့ ကလေးငယ်လေးတွေ၏ ငိုယိုသံတွေကို စိုထိုင်းစေတော့သည်။

တစ်ခါတစ်ရံ သူစဉ်းစားကြည့်မိသည်။ ငါတို့တွေဟာ ယနေ့လိုခေတ်မီနေတဲ့ ခေတ်ပေါ်ရုပ်သံလိုင်းတွေထဲမှာ ဇာတ်ကောင်တွေများဖြစ်နေမလား။ ငါတို့အခန်းတွေက သတင်းတွေထဲမှာဖြစ်ဖြစ် ဇာတ်ကားတွေထဲမှာဖြစ်ဖြစ် ပါများပါနေမလားဟု သူစဉ်းစားနေမိသည်။ ကျန်ခဲ့တဲ့ ရက်အနည်းငယ်ကလည်း မြို့သစ်ဘက်အလုပ်သွားရှာရင်း လက်ဖက်ရည်ဆိုင်မှာ သတင်းလာနေတုန်း ထိုင်ကြည့်မိသေးသည်ကို သူပြန်မြင်ယောင်နေသည်။ ငါတို့မဟုတ်ပေမဲ့ ငါတို့လိုလူတွေ အတော်တွေ့နေရတာပဲဟု သူစဉ်းစားမိခဲ့သေးသည်။ လက်ဖက်ရည်ဆိုင်က ထခါနီးတောင်မှ ငါများပါလာလေမလား သူစိတ်ကူးယဉ်မိသေးသည်။

သေချာတာက သူဘာဆက်လုပ်ရမည်ကို မသိခြင်းပင်။ သူ့ဇနီးကတော့ ကလေးတွေကိုထိန်းရင်း ညည်းညူ၍သာနေလေသည်။ “ဟိုအလတ်ကောင် ရှူးပေါက်တာ ဖြောင့်ဖြောင့်မပေါက်ဘူး။ ဘယ့်နှယ် အိမ်ခေါင်းရင်းဘက် ပြန်လှည့်ပေါက်နေတာလဲ” ဟု ဇနီးသည်က သားအလတ်ကောင်ကို ဆူလိုက်လေသည်။ သားအလတ်ကောင်က ချောင်နေသော ဘောင်းဘီကို လက်နှင့်လိမ်ချည်ရင်း “အမေကလည်း အိမ်ခေါင်းရင်းက ဘယ်လိုဟာလဲမှမသိတာ” ဟု ပြန်ပြောတော့သည်။ ထိုစကားသံတွေက သူကြားနေကျစကားသံတွေပင်။ သို့သော်လည်း ဒီတစ်ခါပိုကျယ်လောင်နေသည်။ သို့သော် သူပိုတိတ်ဆိတ်လာသည်။ သူတိတ်ဆိတ်လာလေလေ မိုးရွာသံက ပိုကျယ်လောင်လာလေလေပင်ဖြစ်သည်။ နေ့စဉ်ရက်ဆက်ရွာနေသော မိုး၊ မကျနိုင်သေးသောရေ၊ မတွေးဝံ့သော သူတို့ဘဝတွေကို ပိုမိုတွေးတောနေရသည်ပင် သူ့အတွက် အရာရာဟာလေးလံနေတော့သည်။

နှစ်တစ်နှစ်ကုန်ခါနီး၏ အလှုပ်အခတ်တွေသည် သူတို့ဝန်းကျင်က သူတို့လိုတဲငယ်လေးတွေ လေအတိုးမှာ လှုပ်ခတ်နေခြင်းထက် ဘဝပုံရိပ်တွေက ပိုမိုလှုပ်ခတ်လာတော့သည်။ မိုးရွာတာရပ်သွားပြီး ရေတွေပြန်ကျသွားသော်လည်း လယ်ယာထဲကစပါးပင်တွေက ပြန်လည်မသန်မာလာတော့ပေ။ ပြန်လည်မစိမ်းလန်းလာတော့ပေ။ ပြန်လည်မသီးပွင့်နိုင်တော့ပေ။ ဒါသူတို့၏ အနာဂတ်ပါ နစ်မြုပ်သွားခြင်းပင်။ သူတို့၏ မျှော်လင့်ချက်ပါ ကျိုးကြေသွားခြင်းပင်။ သူတို့၏ အပြုံးတွေပါ နှုတ်ဆိတ်သွားခြင်းပင်။ မပြောပလောက်သော လယ်မြေကွက်လေးတွေသာ ပိုင်ဆိုင်ကြသော သူတို့အတွက် ဘယ်လိုရှေ့ဆက်ကြမည်နည်း။ ဒီမေးခွန်းက သတင်းတစ်ပုဒ်ထဲက အစီအစဉ်ကြေညာသူမေးလိုက်သော မေးခွန်းပင်။ သူလက်ဖက်ရည်ဆိုင်ထဲက တီဗွီရှေ့ကနေ ကျယ်လောင်စွာ အော်ဖြေလိုက်ချင်မှာပဲဖြစ်သည်။ သို့သော် သူတိတ်ဆိတ်နေမြဲပင်။ လှည့်ပြန်လာခဲ့မြဲပင်။

မေးခွန်းတွေ၊ မေးခွန်းတွေ၊ အထပ်လိုက်။ ထိုမေးခွန်းတွေက လယ်ယာမြေတွေထဲက ရေမြုပ်ထားသော စပါးပင်တွေလိုဖြစ်နေသည်။ နွံအထပ်ထပ်နှင့် ပြားပြားဝပ်နေသော မေးခွန်းတွေ။ မအောင်မြင်နိုင်သော မေးခွန်းတွေ။ ဈေးကွက်မဝင်နိုင်သော မေးခွန်းတွေ။ ဝမ်းစာမလုံလောက်သော မေးခွန်းတွေ။ သူ့ဇနီးနှင့် ကလေးငယ်တွေက အမြဲမေးနေခဲ့သော မေးခွန်းတွေ။ သူတို့ဝန်းကျင်ထဲမှ အမြဲမေးနေကျ မေးခွန်းတွေ။ သူ့ကိုယ်သူ ပြန်လည်မေးနေတတ်သော မေးခွန်းတွေ။ နှစ်ပေါင်းများစွာကြာပြီဖြစ်သော မေးခွန်းတွေ။ စနစ်ပေါင်းများစွာပြောင်းလဲခဲ့ပြီးသော မေးခွန်းတွေ အကြိမ်ကြိမ်ရေမြုပ်ခဲ့သော မေးခွန်းတွေ။ အကြိမ်ကြိမ်သိမ်းဆည်းခံရသော မေးခွန်းတွေ။

ထိုအဖြေမရှိသော မေးခွန်းတွေက သူတို့ကို အကြိမ်ကြိမ်နှိပ်စက်နေသည်။ သူအခုလည်း တစ်စုံတစ်ရာအတွက် စိတ်ထဲမတင်မကျဖြစ်နေသည်။ မနေ့က သားအလတ်ကောင်၏ အိမ်ခေါင်းရင်း ခြေရင်းမှန်းမသိသောကိစ္စပင်။

တကယ်တော့ ထိုအဆင်မပြေခြင်းတွေက ဒီနေ့မှ သူလျှောက်တွေးနေခြင်းပင်။ သူ့သားအလတ်ကောင်၏ အိမ်ခေါင်းရင်း ခြေရင်းကိစ္စနှင့်ဆက်စပ်ပြီး ဖြစ်ပေါ်လာသော အတွေးတွေပင်။ သူတို့ဒေသက လူတွေအားလုံးလိုလို သူတို့လိုချည်းပင်။ တဲသာသာ အိမ်ငယ်လေးတွေနှင့် နှစ်ပေါင်းများစွာ နေထိုင်ခဲ့လာသည်ပင်။ အိမ်ခေါင်းရင်းဟု သတ်မှတ်ထားသောနေရာတွင် ဘုရားကားလေးတွေသာ ချိတ်ထားကြမြဲ။ ရေကြီးတဲ့ရက်တွေဆိုရင် တစ်ခါတစ်ရံ အိမ်ကြမ်းခင်းမြုပ်တဲ့အခါ မြုပ်သည်။ လယ်ထွက်စပါး မဖြစ်စလောက်လေးတွေ ကောင်းကောင်းရတဲ့အခါရသည်။ ဆုံးရှုံးသွားတဲ့အခါ ဆုံးရှုံးသည်။ ဘာပဲဖြစ်ဖြစ် ဒီလယ်ယာ အနည်းငယ်လေးတွေက သူတို့၏ဝမ်းအိုးလေးတွေပင်။ မိမိစိုက်ပျိုးလိုက်သော အသီးအပွင့်ကို ပြန်လည်ရိတ်သိမ်းခွင့် ပြန်လာစားသုံးခွင့်တော့ မျှော်လင့်လို့ရသေးသည်။ အိမ်ခေါင်းရင်းမှာ ဘုရားဆင်းတုတော်နှင့် ဘုရားကျောင်းဆောင်ထားဖို့ကိစ္စ မေ့ပျောက်သွားသည်။ ထိုသို့တစ်ခါတစ်ရံ ပေါ်လာတတ်ပြီး တစ်ခါတစ်ရံ မေ့ပျောက်သွားတတ်သည်။ မေ့ပျောက်ချိန်ကသာ ပိုမိုများပြားပါသည်။

အိမ်ခေါင်းရင်း ခြေရင်းထက် ဝမ်းခေါင်းရင်းခြေရင်း နေရာမှန်ဖို့သာ သူတို့နိစ္စဓူ၀ ရုန်းကန်နေကြရသည်။ ယခုလည်း လယ်ယာထဲက သီးနှံတွေကဆုံးရှုံးပြီ။ မကြာခင် စပ်ကူးမတ်ကူး တစ္ဆေက ခြောက်လှန့်လာတော့မည်။ သူကြိုတင်တုန်လှုပ်ရလေပြီ။ သူဘာဆက်လုပ်ရင် ကောင်းမလဲဟု မေးခွန်းထုတ်နေမိသည်။ ထိုမေးခွန်းတွေက ကုန်ဈေးနှုန်းတွေ၊ ဆန်ဈေးတွေ၊ ကျောင်းစရိတ်တွေက သူ့ကိုဝိုင်းမေးနေကြခြင်းပင်။ သူဖြေဆိုဖို့ရန် ခက်နေတော့သည်။ မိုးကတော့စဲသွားပြီ။ ရေကလည်းကျသွားပြီ။ မစဲသေးသော မကျသေးသောအရာတွေက သူတို့လူမှုဘဝအခက်အခဲတွေပင်။

ထိုသို့အခြေအနေမျိုးတွေအတွက် သူဘာမှအဖြေမထုတ်နိုင်ခင်မှာ သူ့ဇနီးထံက သတင်းစကားက သူ့ကိုပိုမိုထိတ်လန့်သွားစေသည်။ သူတို့နှင့် တစ်နယ်တည်းလယ်သမားတချို့၏ လယ်ယာမြေလေးတွေ သိမ်းဆည်းခံရသောသတင်းပင်။ တချို့တော့ လျော်ကြေးအနည်းငယ်ရကြသည်။ တချို့ကမရကြ။ တရားစွဲပင်ခံကြရသေးသည်ဟုဆိုသည်။ သူ့ဇနီးသည်၏ ပြောဆိုနေသံများကို သူအံ့သြထိတ်လန့်နေတော့သည်။ ရုပ်သံလိုင်းတွေထဲက သတင်းလည်းမဟုတ်ပြန်။ သတင်းစာထဲက သတင်းလည်းမဟုတ်ပြန်။ ဒါတကယ့် သတင်း။ ငါတို့တွေဆီ အရင်ဆုံးရောက်လာသော သတင်းဟု သူရေရွတ်နေမိသည်။ သူစိတ်ထဲမကောင်းစွာနှင့် ငယ်စဉ်က သူ့မိဘတွေပြောသော စကားသံတွေကို ကြားယောင်နေမိသည်။

သူ့မိဘတွေက သူ့ကိုငယ်စဉ်က တီဗွီရုပ်သံထဲတွေ၊ ဗီဒီယိုကားတွေထဲမှာ မပါချင်ဘူးလားဟု မေးခဲ့ဖူးသည်။ သူအဲဒီအချိန်က “သိပ်ပါချင်တာပေါ့။ သိပ်သရုပ်ဆောင်လို ဖြစ်ချင်တာပေါ့” ဟုဖြေခဲ့ဖူးသည်။ အခုနောက်ပိုင်းကျရင် သူရုပ်သံထဲ ဘယ်လိုများပါလေမလဲဟု စဉ်းစားရင်း စိတ်တွေလေးလံလာတော့သည်။ ဇနီးသည်နှင့် ကလေးငယ်လေးတွေကတော့ ည၏ဖြားယောင်းမှုကို ကြာရှည်စွာမစောင့်နိုင်တော့ဘဲ အိပ်ပျော်သွားကြလေပြီ။ သူသာ ညနှင့်အတူ အပြိုင်မှောင်မိုက်နေတော့သည်။ သူ့သား အလတ်ကောင်လေးကို ကြည့်လိုက်တော့ အိမ်ခေါင်းရင်းဘက်ကို ခြေထောက်လှည့်လျက်သားနှင့် အိပ်ပျော်နေသည်။ အဲဒီညက ညဉ့်အတော်နက်မှ ခဏတာအိပ်ပျော်သွားခဲ့သည်။

သူ့အိပ်မက်ထဲမှာ သူမြို့သစ်ဘက်သွားရင်း လက်ဖက်ရည်ဆိုင်ထိုင်ကာ လက်ဖက်ရည်သောက်ရင်း ရုပ်သံထဲကသတင်းတွေကို ထိုင်ကြည့်နေမိသည်။ ထိုရုပ်သံထဲမှာ သူ့ကိုယ်သူ ပြန်တွေ့နေရသည်။ သူကျယ်လောင်စွာ စကားတွေပြောနေခဲ့သည်။ သူ့လယ်ယာလေးတချို့ကိုလည်း ခြံစည်းရိုးခတ်ထားသည်ကို သူပြန်တွေ့နေရသည်ဟု အိပ်မက်မြင်မက်နေလေသည်။