မန္တလေးဈေးချိုတော်ကို အောက်တိုဘာ ၂၄ ရက်က တွေ့ရစဉ်
တန်ဆောင်တိုင် ဈေးပိတ်ရက်အဖြစ် မန္တလေးဈေးချိုတော်နှင့် တိုက်တန်းကြီးဈေးရုံအသီးသီးအား သုံးရက်ဈေးပိတ်သွားမည်ဖြစ်ကြောင်း ဈေးချိုတော်ဈေး အကျိုးတော်ဆောင်အဖွဲ့ထံမှ သိရသည်။
ဈေးချိုတော်နှင့် တိုက်တန်းကြီးဈေးရုံအသီးသီးအား တန်ဆောင်မုန်းလဆန်း ၁၄ ရက် (နိုဝင်ဘာ ၂ ရက်) မှ တန်ဆောင်မုန်းလပြည့်ကျော် ၁ ရက် (နိုဝင်ဘာ ၄ ရက်) အထိ ဈေးပိတ်သွားမည်ဖြစ်ကာ တန်ဆောင်မုန်းလပြည့်ကျော် ၂ ရက် (နိုဝင်ဘာ ၅ ရက်) တွင် ပုံမှန်အတိုင်း ပြန်လည်ဖွင့်လှစ်သွားမည်ဖြစ်ကြောင်း ဈေးအကျိုတော်ဆောင်အဖွဲ့မှ ထုတ်ပြန်ကြေညာထားသည်။
၁၃၇၉ ခုနှစ် အဆင့်မြင့်ဈေးချိုတော်နှင့် တိုက်တန်းကြီးဈေးရုံအသီးသီး၏ ကထိန်ခင်းကျင်းလှူဒါန်းမှုအား ဈေးရုံများအလိုက် မြန်မာပြည်အနှံ့အပြားရှိ ဘုန်းကြီးကျောင်းတိုက်များသို့ သွားရောက်ခင်းကျင်းလှူဒါန်းလေ့ရှိရာ ယခုနှစ်တွင် ကချင်ပြည်နယ် (၁၃) ကြိမ်မြောက် စုပေါင်းမဟာကထိန်အား မန္တလေးမဟာအောင်မြေမြို့နယ် မဟာမြိုင် (၁) ရပ်ကွက်ရှိ သီရိမင်္ဂလာမစိုးရိမ် ပရိယတ္တိစာသင်တိုက်တွင် ကျင်းပခဲ့ပြီး ကျန်ဈေးရုံများအလိုက် ကထိန်ခင်းကျင်းလှူဒါန်းမှုများကို ရခိုင်ပြည်နယ်၊ ကယားပြည်နယ်၊ တနင်္သာရီတိုင်း၊ မကွေးတိုင်း၊ မန္တလေးတိုင်းဒေသကြီးနှင့် စစ်ကိုင်းရှိ ဘုန်းတော်ကြီးကျောင်းများသို့ သွားရောက်လှူဒါန်းသွားမည်ဖြစ်ကြောင်း သိရသည်။ ဈေးချိုတော်ဈေးပိတ်ရက်များအတွင်း လုံခြုံမှုရှိစေရန် ဈေးဆိုင်များမှစ္စည်းများ စနစ်တကျသိမ်းဆည်းခဲ့ကြပါရန်နှင့် လျှပ်စစ်မိန်းဘရိတ်ကာများအား သေချာစစ်ဆေးပိတ်ခဲ့ပါရန် ဈေးအကျိုးတော်ဆောင်အဖွဲ့မှ အသိပေးထုတ်ပြန်ထားသည်။
