ကျပ်သန်းပေါင်းနှစ်သိန်း တန်ဖိုးရှိ အစိုးရငွေတိုက်လက်မှတ်များကို ဈေးပြိုင်စနစ်ဖြင့် လေလံတင်ရောင်းချရာတွင် ကျပ်သန်းပေါင်းတစ်သိန်းကို အများနှင့်ယှဉ်ပြိုင်ရမည့် လေလံအဖြစ် သတ်မှတ်ထားပြီး ကျပ်သန်းပေါင်းတစ်သိန်းကို အများနှင့် ယှဉ်ပြိုင်ရန်မလိုအပ်သည့် လေလံအဖြစ် သတ်မှတ်ထားကြောင်း အစိုးရငွေတိုက်လက်မှတ်များ ဈေးပြိုင်စနစ်ဖြင့် ရောင်းချခြင်းဆိုင်ရာ ကြေညာချက်လေလံအမှတ်စဉ် TB0063 ကို အောက်တိုဘာ ၂၃ ရက်တွင် ထုတ်ပြန်ကြေညာမှုအရ သိရသည်။

အောက်တိုဘာ ၂၃ ရက်တွင် လေလံပွဲကြေညာခဲ့သည့် လေလံအမှတ်စဉ် TB0063 ကို အောက်တိုဘာ ၂၅ ရက်တွင် လေလံပွဲကျင်းပမည်ဖြစ်ပြီး စာရင်းရှင်းလင်းပေးချေရမည့်နေ့ကို အောက်တိုဘာ ၂၇ ရက်အဖြစ် သတ်မှတ်ထားသည်။ လေလံတင်မည့် ငွေတိုက်စာချုပ်များ၏ သက်တမ်းကို ၈၄ ရက်၊ ၁၈၂ ရက်နှင့် ရက်ပေါင်း ၃၅၀ သတ်မှတ်ထားကြောင်း သိရသည်။

လက်ရှိအစိုးရလက်ထက်တွင် ငါးနှစ်သက်တမ်းအထိရှိလာမည့် အစိုးရငွေတိုက်လက်မှတ် (Treasury Bill) များကို လက်ရှိဘဏ္ဍာနှစ်မှစ၍ ရောင်းချရန်စီစဉ်နေကြောင်း ၂၀၁၇ ခုနှစ် ကာလလတ်ကြွေးမြီစီမံခန့်ခွဲမှု မဟာဗျုဟာတွင် ဖော်ပြထားမှုအရ သိရသည်။

မြန်မာနိုင်ငံတော် ဗဟိုဘဏ်အနေဖြင့် ငွေချေးယူခြင်းနှင့် လိုငွေဖြည့်ဆည်းခြင်းများကို လျှော့ချနိုင်ရန်နှင့် ပြည်တွင်းငွေကြေး ဈေးကွက်ဖွံ့ဖြိုးတိုးတက်စေရန် ဈေးကွက်ကို အခြေခံသည့် အစိုးရငွေချေး သက်သေခံလက်မှတ်စနစ်သို့ ပြောင်းလဲသည့် အစီအစဉ်များအဖြစ် ၂၀၁၅ ခုနှစ် ဇန်နဝါရီတွင် အစိုးရငွေတိုက်လက်မှတ်များကို ဈေးပြိုင်စနစ်ဖြင့် စတင်ရောင်းချခဲ့ပြီး အစိုးရငွေတိုက်စာချုပ် (Treasure Bonds) များကို ၂၀၁၆ ခုနှစ် စက်တင်ဘာတွင် ဈေးပြိုင်စနစ်ဖြင့် စတင်ရောင်းချခဲ့ကြောင်း သိရသည်။

အစိုးရငွေတိုက်လက်မှတ်များကို လက်ရှိတွင် သုံးလ၊ ခြောက်လနှင့် တစ်နှစ်သက်တမ်းဖြင့် ရောင်းချပေးနေခြင်းဖြစ်ပြီး ဈေးပြိုင်စနစ်ဖြင့် ရောင်းချရာတွင် ၂၀၁၅ ခုနှစ် ဇန်နဝါရီ ၂၈ ရက်မှ ၂၀၁၇ ခုနှစ် မတ် ၃၀ ရက်အထိ ၅၁ ကြိမ် လေလံခေါ်ယူခဲ့ပြီး လက်ရှိတွင် ၆၃ ကြိမ်အထိ ရောက်ရှိလာပြီဖြစ်ကြောင်း သိရသည်။

မြန်မာနိုင်ငံတော် ဗဟိုဘဏ်သည် ငွေကြေးမူဝါဒကို အကောင်အထည်ဖော်ရာ၌ ငွေကြေးမူဝါဒ နည်းလမ်းများဖြစ်သည့် အတိုးနှုန်းမူဝါဒ ချမှတ်ဆောင်ရွက်ခြင်း၊ အနည်းဆုံး သီးသန့်ငွေလိုအပ်ချက် သတ်မှတ်ခြင်း၊ ငွေလဲလှယ်နှုန်းမူဝါဒ ချမှတ်ဆောင်ရွက်ခြင်းနှင့် လွတ်လပ်သော ဈေးကွက်ဆိုင်ရာ လုပ်ဆောင်ချက်များကို အကောင်အထည်ဖော် ဆောင်ရွက်နေကြောင်း သိရသည်။

လက်ရှိ ဘဏ္ဍာနှစ်တွင်ဗဟိုဘဏ် အနေဖြင့် ၂၀၁၆-၂၁၀၇ ဘဏ္ဍာနှစ်တွင် ဖြစ်ပေါ်ခဲ့သည့် ပြည်ထောင်စုအစိုးရလိုငွေများကို စီမံကိန်းနှင့် ဘဏ္ဍာရေးဝန်ကြီးဌာနမှ ခန့်မှန်းလျာထားချက်အတိုင်း ကျပ် ၁၂၃၆ ဘီလျံကို ဗဟိုဘဏ်မှ ချေးငွေရယူရန် ဆုံးဖြတ်ခဲ့ပြီး ဗဟိုဘဏ်ထံမှ အစိုးရငွေတိုက်လက်မှတ်နှင့် ဝယ်ယူခြင်း ကျပ် ၁၂၃၆ ဘီလျံ (ရာခိုင်နှုန်း ၄၀)၊ အစိုးရငွေတိုက်လက်မှတ်များ လေလံစနစ်ဖြင့် ရောင်းချခြင်း ကျပ် ၉၂၇ ဘီလျံ (ရာခိုင်နှုန်း ၃၀)၊ အစိုးရငွေတိုက်စာချုပ်များ လေလံစနစ်ဖြင့် ရောင်းချခြင်း ကျပ် ၉၂၇ ဘီလျံ (ရာခိုင်နှုန်း ၃၀)၊ စုစုပေါင်းဘီလျံ ၃၀၉၀ ဖြည့်ဆည်းပေးရန်နှင့် ၂၀၁၇-၂၀၁၈ ဘဏ္ဍာနှစ်အတွက် ဘတ်ဂျက်လိုငွေများ၏ ရာခိုင်နှုန်း ၃၀ အတွင်းကို မြန်မာနိုင်ငံတော်ဗဟိုဘဏ်မှ ဖြည့်ဆည်းပေးရန် ရည်မှန်းဆောင်ရွက်မည်ဖြစ်ကြောင်းနှင့် ကျပ်ဘီလျံ ၁၂၀၀ ကို ဗဟိုဘဏ်မှ ချေးယူရန် စီမံထားကြောင်း သိရသည်။