ရခိုင်ပြည်နယ် အရေးတွင် ဒုက္ခရောက်ခဲ့ရသည့် ရခိုင်တိုင်းရင်းသားများ၊ ဘင်္ဂါလီများအတွက် ခရိုနီစီးပွားရေး လုပ်ငန်းရှင်များထံမှ လူသားချင်း စာနာမှု အကူအညီ အလှူငွေကျပ် သိန်းပေါင်း တစ်သိန်းကျော် ရရှိ

နေပြည်တော် NRPC တွင် ပြုလုပ်သည့် ရခိုင်ပြည်နယ်အတွင်း လူသားချင်းစာနာမှု အကူအညီပေးရေး၊ ပြန်လည်နေရာချထားရေး ဖွံ့ဖြိုးရေး စီမံကိန်းများအတွက် ခရိုနီကြီးများ၏ အလှူငွေပေးအပ်ပွဲတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အဖွင့်အမှာစကား ပြောကြားစဉ်

ရခိုင်ပြည်နယ် အရေးတွင် ဒုက္ခရောက်ခဲ့ရသည့် ရခိုင်တိုင်းရင်းသားများ၊ ဘင်္ဂါလီများအတွက် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ရရှိသည့် ဝတ်စုံစရိတ် ရရှိငွေ အမေရိကန်ဒေါ်လာ ၄၀၀၀ လှူဒါန်းခြင်းနှင့် ခရိုနီစီးပွားရေး လုပ်ငန်းရှင်များထံမှ လူသားချင်းစာနာမှု အကူအညီ အလှူငွေ ကျပ်သိန်းပေါင်း တစ်သိန်းခုနစ်သောင်းကျော် ရရှိခဲ့ကြောင်း သိရသည်။

ရခိုင်ပြည်နယ်အတွင်း လူသားချင်း စာနာမှု အကူအညီ အထောက်အပံ့ပေးရေး၊ ပြန်လည်နေရာချထားရေး၊ ဖွံ့ဖြိုးရေးစီမံကိန်း ကော်မတီအတွက် အလှူငွေပေးအပ်ပွဲအား အောက်တိုဘာ ၂၀ ရက်က နေပြည်တော်ရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာန (NRPC) တွင် ပြုလုပ်ခဲ့ပြီး မြန်မာ့စီးပွားရေး လုပ်ငန်းရှင်များက လှူဒါန်းခဲ့ခြင်း ဖြစ်သည်။

အလှူငွေပေးအပ်ပွဲ အခမ်းအနားသို့ တက်ရောက်လာသူများနှင့် အမှတ်တရ စုပေါင်းဓာတ်ပုံ ရိုက်ကူးစဉ်

စီးပွားရေး လုပ်ငန်းရှင်များဖြစ်သည့် ကမ္ဘောဇကုမ္ပဏီ ဦးအောင်ကိုဝင်းမှ ကျပ်သိန်းပေါင်း ၃၀၀၀၀၊ MBCCD စေပိုင်ကုမ္ပဏီ ဦးမောင်ဝိတ်မှ ကျပ်သိန်းပေါင်း ၁၅၀၀၀၊ Chairman Eden Group of Companies ဦးချစ်ခိုင်၊ MD၊ Asia World ကုမ္ပဏီ ဦးထွန်းမြင့်နိုင်၊ ဇေကမ္ဘာကုမ္ပဏီ ဦးခင်ရွှေ၊ တော်ဝင်မိသားစု ကုမ္ပဏီ ဦးကိုကိုထွေး၊ IBTC ဦးအောင်မိုးကျော်၊ ရွှေသံလွင် ထရေးဒင်း ကုမ္ပဏီ ဦးကျော်ဝင်း၊ Max Group of Companies ဦးဇော်ဇော်နှင့် Chairman United Amera Bank ကုမ္ပဏီ ဦးနေအောင်တို့မှ ကျပ်သိန်း ၁၀၀၀၀ စီ အသီးသီး လှူဒါန်းခဲ့ကြောင်း သိရသည်။

ထို့ပြင် အောင်မြင်သူ ကုမ္ပဏီများအုပ်စု ဦးလှမျိုးနှင့် ဦးစောငြိမ်းမှ ကျပ်သိန်း ၇၀၀၀၊ သမဝါယမဘဏ် လီမိတက် ဦးခင်မောင်အေးမှ ကျပ်သိန်း ၅၀၀၀၊ Alpine ကုမ္ပဏီ ဒေါက်တာစိုင်းဆမ်ထွန်း၊ Yangon Crown ကုမ္ပဏီ ဦးရှောက်စန်း၊ ဧရာဝတီတောင်သူလယ်သမား ဖွံ့ဖြိုးရေးဘဏ် ဦးဇော်ဝင်းရှိန်၊ ဦးတိုးနိုင်မန်း+ဒေါ်ဇေဇင်လတ် မိသားစုနှင့် ဦးဇေသီဟ+ဒေါ်နန္ဒလှိုင် မိသားစုတို့မှ ကျပ်သိန်း ၃၀၀၀ စီ လှူဒါန်းခဲ့ပြီး ဦးသိန်းထွန်းမှ ကျပ်သိန်း ၂၀၀၀၊ KMD ကုမ္ပဏီ ဦးသောင်းတင်နှင့် ရွှေတောင်အင်တာနေရှင်နယ် ကုမ္ပဏီ ဦးအောင်ဇော်နိုင်တို့မှ ကျပ်သိန်း ၁၀၀၀ စီ၊ မြန်မာနိုင်ငံ လိုင်စင်ရ ကန်ထရိုက်တာများ အသင်းနှင့် Myanmar Agri Business in Public Group ဦးရဲမင်းအောင်တို့မှ ကျပ်သိန်း ၅၀၀ စီ စုစုပေါင်း အလှူငွေ ကျပ်သိန်းပေါင်း ၁၇၇၀၀၀ လှူဒါန်းခဲ့ကြောင်း သိရသည်။

တက်ရောက်လာကြသူများနှင့်အတူ ဒေါ်အောင်ဆန်းစုကြည်အား တွေ့ရစဉ်

အဆိုပါ အလှူငွေပေးအပ်ပွဲ အခမ်းအနားတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က နိုင်ငံတွင် ဥပဒေမဲ့ လုပ်ရပ်များ ရှိလာပါက ဥပဒေမဲ့ လုပ်ရပ်များ၏ အကျိုးဆက်ကို မိမိတို့က တာဝန်ယူသည်ဆိုခြင်းကို ပြသရန် အချိန်ဖြစ်ကြောင်း ပြောကြားခဲ့သည်။

“ရခိုင်ပြည်နယ် ရှေ့ဖွံ့ဖြိုးတိုးတက်ဖို့အတွက် အကြံပြုချက်တွေ ရှိပါတယ်။ ဒါကလည်း အင်မတန်မှကောင်းတဲ့ အကြံပြုချက်ပါ။ အသေးစိတ်ကတော့ ကျွန်မတို့အားလုံး ဒါကို ဆွေးနွေးပြီးတော့ အစီအစဉ်ချရမှာ ဖြစ်ပါတယ်။ ကျွန်မတော့ မြန်မြန်ဆန်ဆန် ကျွန်မတို့ တိုးတက်မှုကိုပြဖို့ လိုတယ်။ မြန်မြန်ဆန်ဆန် တိုးတက်မှုပြဖို့ ဆိုတာဟာ စိတ်တက်ကြွစွာနဲ့ လုပ်စေချင်တယ်။ နောက်တစ်ခုကလည်း ကျွန်မတို့နိုင်ငံဟာ ကျွန်မတို့နိုင်ငံရဲ့ ကိစ္စကို အားလုံးဝိုင်းပြီးတော့ လုပ်နိုင်ရဲ့လားဆိုပြီး ကြည့်လေ့လာနေတာလည်း ရှိပါတယ်။ အဲဒါကို ကျွန်မတို့ ပြရမယ်။ ကျွန်မတို့ လုပ်နိုင်တယ် ဆိုတာ။ ကျွန်မတို့နိုင်ငံဟာ ရုပ်ပိုင်းဆိုင်ရာအရ မချမ်းသာပေမယ့် ကျွန်မတို့မှာ အခြား အင်အားရှိတယ် ဆိုတာကို ကျွန်မတို့ ရှင်းရှင်းလင်းလင်း ပြနိုင်ရမယ်။ အားရဲ့ အဓိက အင်အားကတော့ အခု ပူးပေါင်းဆောင်ရွက်ခြင်းပဲ။ ကျွန်မတို့ စီစဉ်တဲ့ အခါမှာ စီးပွားရေး လုပ်ငန်းရှင်တွေကလည်း ပွင့်ပွင့်လင်းလင်းနဲ့ အကြံဉာဏ် ပေးစေချင်ပါတယ်။ အကြံပြုချက်အားလုံး ဆိုတာကတော့ ကျွန်မတို့ အကောင်အထည်ဖော်ဖို့ လက်တွေ့ကျမှာ မဟုတ်ဘူး။ အသင့်တော်ဆုံးတွေကို ကျွန်မတို့ကနေ ရွေးပြီးလုပ်ရမယ်။ နောက်တစ်ခုက ဦးစားပေး လုပ်ငန်းတွေ ဘာတွေဖြစ်မလဲ ဆိုတာကို အားလုံး ဆုံးဖြတ်ရမယ်။ ဦးစားပေး လုပ်တယ် ဆိုတာက ရေတိုမှာလည်း အသီးအပွင့်တွေကို မြင်နိုင်တဲ့ ဟာတွေကိုပဲ ကျွန်မတို့ ရွေးရမယ်။ တချို့ပေါ့နော်။ တချို့ကလည်း ဆက်ပြီး ရေရှည်သွားဖို့အတွက် အခုကတည်းက စရမယ် ဆိုတာလည်း ရှိပါတယ်။ ဒါတွေကို ကျွန်မတို့က လူမှုရေးဘက်ကရော၊ စီးပွားရေးဘက်ကရော၊ နိုင်ငံရေးဘက်ကရော ဒီသုံးဘက်စလုံးက ကြည့်ပြီးတော့ ကျွန်မတို့ ရွေးရမှာပါ။ ဥပမာအားဖြင့် ဆိုရင် ပြန်လည်ထူထောင်ရေး ဆိုတာဟာ ပျက်စီးသွားတဲ့ ရွာတွေ၊ မီးပြာကျသွားတဲ့ ရွာတွေ၊ ကျွန်မတို့ ပြန်လည်တည်ဆောက်ရေး ဆိုတာဟာ ဒါက လူမှုရေးအရ လိုအပ်တာလည်း ဖြစ်တယ်။ နိုင်ငံရေးအရ လိုအပ်တာလည်း ဖြစ်တယ်။ ဘာဖြစ်လို့လဲဆိုတော့ ကျွန်မတို့က ဒီလိုဖြေရှင်းဖို့အတွက် အားပေးတာ မဟုတ်ဘူး။ ဒါတွေကိုလည်း ကျွန်မ မကြိုက်ဘူး။ ကျွန်မတို့နိုင်ငံမှာ ဥပဒေမဲ့ လုပ်ရပ်တွေ ရှိလို့ရှိရင် ဥပဒေမဲ့ လုပ်ရပ်ရဲ့ အကျိုးဆက်တွေကို ကျွန်မတို့ကနေ တာဝန်ယူတယ် ဆိုတာကို ပြဖို့ အချိန်ဖြစ်တယ်။ နိုင်ငံရေးအရ ပြန်လည်ပြီးတော့ ပြုပြင်ထူထောင်ရမှာ ဖြစ်ပါတယ်။ လူမှုရေးအရတော့ ရှင်းပြစရာ မလိုတော့ဘူးပေါ့နော်။ ဒါကတော့ ဒုက္ခရောက်သွားတဲ့ သူတွေကို ပြန်လည်ကူညီဖို့ဆိုတာ လူမှုရေးအရ လိုအပ်ချက်ပဲ။ စီးပွားရေးအရ လိုအပ်ချက်လည်း ရှိပါတယ်။ ကိုယ့်ရပ်ရွာမှာ ပြန်ပြီး နေထိုင်မှလည်း ပုံမှန်အလုပ်တွေကို ပြန်ပြီး လုပ်နိုင်မှာပါ။ ပုံမှန်အလုပ်တွေ ပြန်ပြီးလုပ်နိုင်မှလည်း ကျွန်မတို့ စီးပွားရေး ယန္တရားကြီးက ပြန်ပြီးလည်လာမှာပါ။ စီးပွားရေး ယန္တရားကြီး လည်တယ်ဆိုတဲ့ အခါမှာ အရင်ယန္တရား အဟောင်းကြီးကိုပဲ ပြန်လည်အောင်လုပ်ဖို့ မဟုတ်ပါဘူး။ ယန္တရား အသစ်တွေကိုလည်း ကျွန်မတို့ အကောင်အထည် ဖော်ရမယ်။ ဒီနေရာမှာ စီးပွားရေး လုပ်ငန်းရှင်တွေက အများကြီး အတွေးအခေါ်အသစ်တွေနဲ့ အများကြီး ကူညီနိုင်မယ်လို့ ကျွန်မတို့ ထင်ပါတယ်။ အရင်တုန်းက လုပ်ခဲ့တာတွေဟာ လုံလောက်တယ်ဆိုရင် ရခိုင်ပြည်နယ် အခုအခြေအနေမှာ မရှိဘူး။ အရင်တုန်းက လုပ်ခဲ့တာတွေက မလုံလောက်လို့ အခုအခြေအနေမှာ ရှိနေတာ။ အနာဂတ်ကို ကြည့်ပြီးတော့ ဘယ်ဘက်မှာ ဖြည့်ဆည်းပေးဖို့ လိုသလဲ ဆိုတာကို ကျွန်မတို့အားလုံး ညီညီညွတ်ညွတ်နဲ့ ဝိုင်းပြီးတော့ ဆွေးနွေးပေးစေချင်ပါတယ်” ဟု နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။

ဆက်လက်၍ “ရခိုင်ပြည်နယ်ကို ဒေသသတ်မှတ်ပြီးတော့ ဘယ်ဒေသတွေအတွက် ဘယ်လုပ်ငန်းရှင်တွေက တာဝန်ယူမယ်ဆိုပြီး အဲဒီလိုနည်းနဲ့ ကျွန်မတို့ သွားစေချင်တယ်ဆိုတာ။ ဘာဖြစ်လို့လဲဆိုတော့ ကျွန်မတို့က ကောင်းတဲ့ပြိုင်ဆိုင်မှုလေးတွေကို ကျွန်မတို့ အားပေးချင်တယ်။ တစ်ယောက်နဲ့ မနာလိုလို့ မဟုတ်ဘူး။ သဝန်တိုလို့ မဟုတ်ဘူး။ တို့က တို့နိုင်ငံအတွက် ပိုပြီးတော့ ထိထိရောက်ရောက် မြန်မြန်ဆန်ဆန် ကူညီပေးနိုင်မယ်ဆိုတဲ့ ကောင်းတဲ့ မာနလေးနဲ့ပေါ့။ ကောင်းတဲ့ ပြိုင်ဆိုင်ချင်တဲ့ စိတ်လေးတွေနဲ့ တစ်ယောက်နဲ့တစ်ယောက် ပြိုင်ဆိုင်တာဟာ ဒါဟာ အဆိုးမဟုတ်ဘူးလို့ ကျွန်မမြင်ပါတယ်။ တစ်ခါတလေလည်း သင်ယူလို့ရတယ်။ ကျွန်တို့နိုင်ငံအတွက်တင် မဟုတ်ဘူး။ ဒီဒေသအတွက်တင် မဟုတ်ဘူး။ လုပ်ငန်းရှင်တွေ အတွက်လည်း အများကြီး ရှေရှည်မှာ အများကြီး အကျိုးရှိနိုင်ပါတယ်။ တစ်ယောက်နဲ့တစ်ယောက် သင်ယူတဲ့ သဘောမျိုးပေါ့။ မြန်မြန်ဆန်ဆန် အောင်မြင်တဲ့သူတွေ၊ ထိထိရောက်ရောက် လုပ်နိုင်တဲ့သူတွေက ဘာ့ကြောင့် ဒီလိုလုပ်နိုင်သလဲ။ ဘာ့ကြောင့် အောင်မြင်သလဲ။ ဘာလု့ိ ထိရောက်သလဲ။ အဲဒီဟာတွေကလည်း တစ်နည်းအားဖြင့်ဆိုရင် သင်ခန်းစာ အခမဲ့ ရသလိုပဲ ဖြစ်သွားမယ်။ ကျွန်မတု့ိ တစ်ယောက်နဲ့တစ်ယောက် ကူညီခြင်းအားဖြင့် အားလုံးအတွက် တိုးတက်မှုရှိနိုင်မှာ ဖြစ်ပါတယ်” ဟု ဒေါ်အောင်ဆန်းစုကြည်က ပြောကြားသည်။ ၎င်းက “ပိုက်ဆံဆိုတာကို ကျွန်မတို့ တောင်းနေတာ မဟုတ်ပါဘူး။ ပိုက်ဆံက အရေးကြီးတယ် ဆိုပေမယ့် အဓိကက ပိုက်ဆံထက် ကျွန်မတို့ကနေပြီးတော့ ကျွမ်းကျင်မှု လိုပါတယ်။ ပိုက်ဆံကို ကျွမ်းကျွမ်းကျင်ကျင် မသုံးနိုင်လို့ရှိရင် အဟောသိကံ ဖြစ်သွားမှာပါ။ ကျွန်မတို့က ကျွမ်းကျင်မှု လိုတယ်။ နောက်ပြီးတော့ အနာဂတ်မှာ ဖြစ်နိုင်ခြေကို တွက်ချက်နိုင်တဲ့ အရည်အချင်း လိုပါတယ်။ အောင်မြင်တဲ့ စီးပွားရေးလုပ်ငန်းရှင်ဆိုတာ အရိုးသားဆုံး ပြောမယ်ဆိုရင် အနာဂတ်ဈေးကွက်ကို နားလည်တယ်။ အနာဂတ်ဈေးကွက်က ဘယ်လိုရှိတယ် ဆိုတာကို တွက်ချက်နိုင်တဲ့ လုပ်ငန်းရှင်တွေဟာ ဒါ အအောင်မြင်ဆုံးပဲ။ အခုလက်ရှိ ပစ္စပ္ပန် ဒီကနေ့အတွက်ပဲ တွက်နိုင်တဲ့ လုပ်ငန်းရှင်တွေက ဘယ်တော့မှ ရေရှည်မှာ အောင်မြင်မှာ မဟုတ်ဘူး။ အနာဂတ်ရဲ့ လိုအပ်ချက်ကို တွက်ချက်နိုင်တဲ့ အရည်အချင်းကို ကျွန်မတို့နိုင်ငံအတွက် လိုတယ်။ ရခိုင်မှာ လုပ်တဲ့ဟာလည်း နောင်အတွက် ကျွန်မတို့ဟာ ပထမဦးဆုံး စမ်းသပ်တဲ့ စီမံကိန်းလို့လည်း ကျွန်မတို့ ယူဆလို့ ရပါတယ်။ ကျွန်မတို့ ပြည်ထောင်စုကြီးမှာ တိုးတက်အောင်မြင်အောင်လုပ်ဖို့ ကိစ္စအများကြီး ရှိတယ်။ ဖွံ့ဖြိုးတိုးတက်မှုရယ် ငြိမ်းချမ်းမှုရယ် ခွဲပြီးတော့ အကောင်အထည် ဖော်ရမှာပါ။ ရခိုင်ဟာ အခုအချိန်မှာ အခက်အခဲဆုံး နေရာလို့ ပြောလို့ရပါတယ်။ အခက်အခဲဆုံးနေရာ ဆိုတာကတော့ နိုင်ငံတကာရဲ့ အာရုံစိုက်မှုက အင်မတန်မှ များတယ်။ အာရုံစိုက်မှု များတယ်ဆိုတာ သူ့မှာ အာရုံစိုက်များပေမယ့် လုပ်ရကိုင်ရတာ ပိုပြီး ခက်ခဲတဲ့ အခြေအနေလည်း ဖြစ်ပါလိမ့်မယ်” ဟု နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။

MBCCD စေပိုင်ကုမ္ပဏီ ဦးမောင်ဝိတ်အား ဂုဏ်ပြုမှတ်တမ်းလွှာ ပြန်လည်ပေးအပ်စဉ်

ထို့ပြင် နိုင်ငံတစ်နိုင်ငံတွင် အချင်းချင်း စည်းစည်းလုံးလုံးဖြင့် လုပ်ဆောင်နိုင်မှအောင်မည်ဟု ယုံကြည်ကြောင်း၊ လက်ရှိ ဆောင်ရွက်မည့် စီမံကိန်းများတွင် အားလုံးက ဝိုင်းဝန်းပြီး တက်ကြွစွာ ပါဝင်ခြင်းသည် နိုင်ငံ၏ အင်အားဖြစ်ကြောင်း၊ ပြည်သူ၊ အစိုးရနှင့် ချမ်းသာသည့် လုပ်ငန်းရှင်ကြီးများကြားတွင် စည်းလုံးညီညွတ်မှု ဖြစ်စေချင်ကြောင်း ဒေါ်အောင်ဆန်းစုကြည်က ပြောကြားခဲ့သည်။

နိုင်ငံတော်၏ အတိုင်ပင်ခံ ပုဂ္ဂိုလ်က “ကျွန်မတို့ အကူအညီတောင်းတယ်ဆိုတာ ငွေရေးကြေးရေးအရ ပစ္စည်းဥစ္စာ ရုပ်ပိုင်းဆိုင်ရာ အကူအညီနဲ့ စိတ်ပိုင်းဆိုင်ရာ အကြံဉာဏ်နဲ့ နောင်အနာဂတ်ကို မှန်းဆနိုင်တဲ့ အရည်အချင်းတွေနဲ့ လုပ်တာပဲ ဖြစ်စေချင်ပါတယ်။ အဲဒီတော့ ကျွန်မ ပူးပေါင်းပြီး ဆောင်ရွက်ချင်တယ်။ ကျွန်မတို့ နိုင်ငံမှာဆိုရင် ပြည်သူနဲ့၊ အစိုးရနဲ့၊ ချမ်းသာတဲ့ လုပ်ငန်းရှင်ကြီးတွေနဲ့ ကြားမှာဆိုရင် ရှိသင့်သလောက် စည်းလုံးညီညွတ်မှု မရှိခဲ့ပါဘူး။ အဲဒီလို စည်းလုံးညီညွတ်မှုကိုလည်း ဖြစ်စေချင်ပါတယ်။ ကျွန်မတို့ လုပ်ငန်းရှင်ကြီးတွေကလည်း နိုင်ငံအတွက် အင်အားပဲ။ အစိုးရ ဆိုတာလည်း နိုင်ငံအတွက် အင်အားပဲ။ ပြည်သူ့ရဲ့ အင်အားကတော့ ဘာနဲ့မှမတူတဲ့ အကြီးမားဆုံး အင်အားပဲ ဖြစ်ပါတယ်။ ဒီအင်အား သုံးခုကို စုစည်းပြီးတော့ ရခိုင်ပြည်နယ်အတွက် အောင်အောင်မြင်မြင် လုပ်ခြင်းအားဖြင့် ကျွန်မတို့ အနာဂတ်ပြည်ထောင်စုအတွက် တကယ့်ခိုင်မာတဲ့ အုတ်မြစ်ချတဲ့ လုပ်ငန်းလို့ပဲ ကျွန်မ အနေနဲ့ ယူဆစေချင်ပါတယ်” ဟု ပြောကြားသည်။