မြန်မာ့အစိမ်းရောင် ပုံရိပ်များအဖွဲ့က ကာကွယ်ပေးထားသည်ဆိုသော သာကေတရှိ YD အရက်ချက်စက်ရုံမှာ မြေတစ်ဧက မပြည့်ဘဲ Waste Water Treatment စနစ် တပ်ဆင်ထားပြီးဖြစ်သည် ဆိုခြင်းကို ပြန်လည်ဆန်းစစ်ရန် လိုအပ်ဟုဆို

သာကေတမြို့နယ်ရှိ YD အရက်ချက် စက်ရုံမှာ ကျဉ်းမြောင်းပြီး တစ်ဧက မပြည့်သည့် မြေ ၀ ဒသမ ၈၆ ဧကပေါ်တွင် တည်ဆောက်ထားသည့်အတွက် ရေဆိုးသန့်စင်စနစ် (Waste Water Treatment System) တပ်ဆင်ထားသည် ဆိုသည်မှာ မဖြစ်နိုင်ဟု မြန်မာနိုင်ငံ ယမကာ ထုတ်လုပ်ဖြန့်ဖြူးသူများ အသင်းရုံးတွင် အောက်တိုဘာ ၁၃ ရက်က သတင်းစာ ရှင်းလင်းစဉ် မြန်မာနိုင်ငံ ယမကာ ထုတ်လုပ်ဖြန့်ဖြူးသူများ အသင်းဝင်များက ရှင်းလင်းပြောကြားသည်။

မြန်မာနိုင်ငံရှိ အရက်ချက်စက်ရုံ ၇၂ ရုံတွင် ရေဆိုးသန့်စင်စက်ရုံ ရှိနေသည့် စက်ရုံ လေးရုံသာ ရှိနေပြီး အဆိုပါ စက်ရုံများမှာ ရောင်နီ၊ ရွှေမြင်းပျံ၊ MDC နှင့် YD အရက်ချက် စက်ရုံများဖြစ်ကာ အဆိုပါ စက်ရုံများအနက် YD အရက်ချက်စက်ရုံမှာ ကျဉ်းမြောင်းနေပြီး တစ်ဧက မပြည့်သည့် မြေ ၀ ဒသမ ၈၆ ဧကပေါ်တွင် တည်ဆောက်ထားသည့်အတွက် ရေဆိုးသန့်စင်စနစ် (Waste Water Treatment System) တပ်ဆင်ထားပြီး ဖြစ်သည် ဆိုသည်မှာ မဖြစ်နိုင်သဖြင့် ပြန်လည်ဆန်းစစ်ရန် လိုအပ်မည်ဟု ‘ဇေ’ အရက်ထုတ်လုပ်သူ၊ ‘ရွှေအိုး’ အရက်ချက် စက်ရုံပိုင်ရှင် ဦးတင်ရွှေက ပြောကြားသည်။

“မြန်မာအစိမ်းရောင် ပုံရိပ်များအဖွဲ့က ကာကွယ်ပေးနေတဲ့ စက်ရုံ ရှိနေတယ်။ ဘယ်လို ကာကွယ်နေလဲဆိုရင် မန္တလေးက ရွှေမြင်းပျံစက်ရုံ၊ ရန်ကုန်သာကေတက YD အရက်ချက် စက်ရုံက သဘာဝပတ်ဝန်းကျင် မညစ်ညမ်းပါဘူး။ အားလုံးပြီးအောင် တည်ဆောက်ထားတယ်လို့ ပြောတယ်။ နောက်ပြီးတော့ လှိုင်လွှတ်တော်ကိုယ်စားလှယ်ကလည်း အဲဒီအဖွဲ့နဲ့ ပေါင်းပြီးတော့ ကျွန်တော့်စက်ရုံထဲအထိ ဓာတ်ပုံတွေ ဝင်ရိုက်တယ်။ ကျွန်တော်က စိတ်မဆိုးပါဘူး။ ပြည်သူ့လွှတ်တော် ကိုယ်စားလှယ်ဆိုတော့ တိုင်းပြည်ကောင်းအောင် လုပ်တာ။ ဒါပေမဲ့ အစိမ်းရောင်ပုံရိပ်များ အဖွဲ့က ကျွန်တော့်စက်ရုံထဲ ဝင်ပြီးတော့ မြေကြီးပုံပဲ တင်လိုက်တယ်။ ရေဆိုးသန့်စင် စနစ်အတွက် စက်ရုံအကြီးကြီး တည်ဆောက်နေတယ်ဆိုတာ မတင်ပြဘူး။ ကျွန်တော့်မှာ လုပ်ငန်းခွဲ ၂၀ ရှိတယ်။ ဝန်ထမ်းပေါင်း ၂၀၀၀ ကျော် ရှိတယ်။ အခွန်က ၅ ဒသမ ၆ ဘီလျံ ဆောင်ထားတယ်။ ဒီနှစ်မှာလည်း ထုတ်လုပ်မှု ဘယ်လောက်လုပ်ပါမယ်ဆိုပြီး ကြေညာလွှာ တင်သွင်းထားတာ ရှိတယ်။ ဒီလိုအချိန်မှာ ကျွန်တော်တို့က သဲသဲမဲမဲ လိုက်ပိတ်နေလဲ အရက်စက်ရုံရဲ့ သဘောသဘာဝက သူတို့ပြောတာက လူ ၇၀၊ ၈၀ လောက် ရှိတယ်။ ဒီစက်ရုံ ပြုတ်သွားရင် အဲဒီလူတွေကို အလုပ်ရှာပေးနိုင်တယ်။ စက်ရုံရဲ့ သဘောသဘာဝက လူ ၁၀၀ လောက်ပဲ ရှိပါတယ်။ ဒါပေမဲ့ ထွက်လာတဲ့ အရက်ဆီတွေကို ပုလင်းသွင်း လုပ်ငန်းတွေ လုပ်မယ်။ အဲဒီမှာ လုပ်သားအင်အားက ၁၀ ဆလောက် ပြန်သုံးနေရတယ်။ ဒါကြောင့် အစိမ်းရောင်ပုံရိပ်က သဲသဲမဲမဲ တိုင်နေလဲ ဆိုတာကို လေ့လာတဲ့ အချိန်မှာ ဒီစက်ရုံကို ကာဗာလုပ်ထားတဲ့အတွက် ပြန်ဆန်းစစ်တယ်။ YD စက်ရုံဆိုရင် ၀ ဒသမ ၈၆ ဧကပဲ ရှိတယ်။ တစ်ရက်ကို ပီပါ ၃၀၀ လောက် ထွက်တယ်။ ပီပါ ၃၀၀ လောက် ထွက်တဲ့စက်ရုံက တစ်ဧကတောင် မပြည့်ဘဲ စက်ရုံတစ်ခုလုံးမှာ စက်ရုံရော၊ Biological Treatment System တွေရော တည်ဆောက်ပြီးပြီလို့ ပြောနေသလဲ။ ဒါ ဆန်းစစ်စရာ ဖြစ်ပါလာပြီ။ သူတို့ရဲ့ Facebook တွေ အကုန် ပြန်ပြီးလေ့လာကြည့်တဲ့ အခါ နောက်ကွယ်မှာ လုပ်ငန်းရှင်တွေ ပါနေတယ်။ အခု သူတို့ ဆန္ဒပြခိုင်းတယ်။ ရပ်ရွာကနေ သတင်းပြန်ပေါက်ကြားလာတယ်။ ရေဆိုးသန့်စင်တဲ့ လုပ်ငန်းက သေးသေးမွှားမွှား မဟုတ်ပါဘူး။ နည်းပညာရော၊ ငွေကြေး ရင်းနှီးမြှုပ်နှံမှု တအား လိုအပ်ပါတယ်။ ကျွန်တော်တို့ မြေနေရာ လိုအပ်ပါတယ်။ အခု တည်ဆောက်နေတဲ့ အချိန်မှာ စက်ရုံတွေ ရုတ်တရက် ပိတ်လိုက်တာကို ပြန်ကုစားပေးဖို့ ပြောချင်ပါတယ်” ဟု ဦးတင်ရွှေက ပြောကြားသည်။

ရွှေအိုး အရက်ချက်စက်ရုံမှ ဦးဆောင်ပြီး ရွှေပြည်သာ စက်မှုဇုန် အတွင်းရှိ မြေဧက ငါးဧကကျော်ကို သိန်းလေးသောင်းဖြင့် ဝယ်ယူခဲ့ပြီး ရေဆိုးသန့်စင်စက်ရုံ တည်ဆောက်ရန် ကျပ်သိန်း ၃၀၀၀၀ အကုန်အကျခံ တည်ဆောက်နေကြောင်း၊ အဆိုပါစက်ရုံ အလုံးစုံ တည်ဆောက်ပြီးပါက ရေဆိုးဂါလန်ပေါင်း ၃၆ သိန်း သိမ်းဆည်းသန့်စင်သွားမည်ဖြစ်ကြောင်း၊ ရွှေပြည်သာစက်မှုဇုန် အတွင်းရှိ အရက်ချက်စက်ရုံများမှလည်း ရွှေအိုးအရက်ချက်စက်ရုံ၏ ရေဆိုးစက်ရုံတွင် ပူးပေါင်းသန့်စင်သွားမည်ဖြစ်ကြောင်း ဦးတင်ရွှေက ပြောကြားသည်။

ရေဆိုး သန့်စင်စနစ် (Waste Water Treatment System) တပ်ဆင်ထားခြင်း မရှိသည့် အရက်ချက် စက်ရုံများ ပိတ်သိမ်းရန် ပြည်ထဲရေး ဝန်ကြီးဌာနမှ ၂၀၁၇ ခုနှစ် ဇူလိုင်လကုန်တွင် ညွှန်ကြားထားပြီးနောက် အရက်ချက်စက်ရုံများအတွင်း ဂယက်ရိုက်မှုများ ဖြစ်ပေါ်နေကာ မြန်မာအစိမ်းရောင်ပုံရိပ်များ အဖွဲ့ကိုလည်း ရွှေပြည်သာမြို့နယ် စက်မှုဇုန် (၁) ရှိ အရက်ချက် စက်ရုံများကို ဆန္ဒပြခဲ့ခြင်းနှင့် ပတ်သက်၍ ရပ်ကွက်နေပြည်သူများအား ခုတုံးလုပ် အကျိုးစီးပွား ရှာသည်ဟု ဆိုကာ ပြည်သူများက ကန့်ကွက်ဆန္ဒပြမှု ဖြစ်ပေါ်ထားသည်။

အဆိုပါ အဖွဲ့မှ ဦးနေဝင်းကမူ ဆန္ဒပြပွဲအတွက် ငွေကြေးထောက်ပံံ့နိုင်မှု မရှိကြောင်း အထင်အမြင်မှားအောင် လုပ်ဆောင်ခြင်းသာ ဖြစ်သည်ဟု ဖြေရှင်းထားသည်။

YD အရက်ချက်စက်ရုံ အနေဖြင့်မူ ရေ ဆိုးသန့်စင်စနစ်၊ Flow မီတာ စသည်ဖြင့် တပ်ဆင်ထားပြီး လက်ရှိတွင် ဈေးကွက်ယှဉ်ပြိုင်နိုင်မှု မရှိသဖြင့် YD စက်ရုံကို ရပ်တန့်ထားရကြောင်း၊ YD အရက်ချက်စက်ရုံမှ တာဝန်ရှိသူ တစ်ဦးက အောက်တိုဘာ ၁၃ ရက်တွင် ကျင်းပသည့် ကုန်ထုတ်လုပ်မှု လုပ်ငန်းများမှ ထွက်ရှိသော စွန့်ပစ်ရေဆိုးများကြောင့် ပတ်ဝန်းကျင် ညစ်ညမ်းမှု လျော့နည်းစေရေး အလုပ်ရုံဆွေးနွေးပွဲ ၂၀၁၇ ဒုတိယနေ့တွင် ပြောကြားခဲ့သည်။