ကလေးသုံးဦး အမှုဖွင့်ခံထားရသည့်အပေါ် ကန့်ကွက်ကြောင်း ဆန္ဒထုတ်ဖော်နေသည့် ပြည်သူများအား တွေ့ရစဉ် (ဓာတ်ပုံ-ရှိုင်းလင်းအောင်)
တောင်ဒဂုံမြို့နယ်ရှိ အောင်ဗောဓိဘုရား အလှူခံပုံးအတွင်းမှ ငွေကျပ် ၃၀၀ ခိုးယူ သည်ဟုဆိုကာ ကလေးသုံးဦးအား ပုဒ်မ ၃၇၉ ဖြင့် အမှုဖွင့်ထားသည့်အပေါ် ကန့်ကွက်ကြောင်း ပြည်သူများက စက်တင်ဘာ ၂၆ ရက်နှင့် ၂၇ ရက်တို့တွင် နှစ်ရက်ဆက်တိုက် ဆန္ဒပြခဲ့ကြသည်။
ကလေးငယ်သုံးဦးသည် စက်တင်ဘာ ၁၃ ရက်ညနေပိုင်းတွင် တောင်ဒဂုံမြို့နယ် အောင်ဗောဓိဆုတောင်းပြည့် စေတီဝင်းအတွင်းရှိ အလှူခံပုံးနှစ်ခုမှ ငွေကျပ် ၃၀၀ ခိုးယူသည်ဟုဆိုကာ ဂေါပကအဖွဲ့ဝင်တစ်ဦးက တရားလိုပြုလုပ်ကာ သက်ဆိုင်ရာ မြို့နယ်ရဲ စခန်းတွင် အမှုဖွင့်ခဲ့ခြင်းဖြစ်သည်။ ယင်းသို့ ကလေးသုံးဦး ငွေကျပ် ၃၀၀ ခိုးယူခဲ့သည်ဟု ဆိုကာ အမှုဖွင့်ထားသည့်အပေါ် ပြည်သူအချို့သည် စက်တင်ဘာ ၂၆ ရက်တွင် တောင်ဒဂုံ ၅၆ လမ်းဆုံမှ စတင်ကန့်ကွက်ကြောင်း ဆန္ဒပြခဲ့ရာ သက်ဆိုင်ရာမြို့နယ် ရဲတပ်ဖွဲ့တာဝန်ရှိသူများက ဆန္ဒထုတ်ဖော်ခြင်းအား အကြောင်းကြားသည့်အချိန်မှာ ၄၈ နာရီမပြည့်သေးဟုဆိုကာ ဆန္ဒပြသူများအား တားဆီးသဖြင့် ရုန်းရင်းဆန်ခတ်မှုများ ဖြစ်ပွားခဲ့သည်။
အဆိုပါ ရဲတပ်ဖွဲ့က ၄၈ နာရီ မပြည့်ဟု ဆိုကာ တားဆီးခဲ့သည့်အတွက် ဆန္ဒပြသူများသည် ၄၈ နာရီပြည့်သည့် စက်တင်ဘာ ၂၇ ရက်ညနေ ၃ နာရီတွင် ပြည်သူ ၂၀၀ ခန့် က တောင်ဒဂုံမြို့နယ် ၅၆ လမ်းဆုံမှစတင်ကာ ဗီနိုင်းများကိုင်ဆောင်၍ တောင်ဒဂုံမြို့နယ် လှော်ကားလမ်းအတိုင်း တောင်ဒဂုံမြို့နယ်အတွင်း လှည့်လည်၍ “ယခင်အစိုးရ လက်ထက်ကတည်းက အများပြည်သူမသိရှိဘဲ ဖွဲ့စည်းထားသော မြို့နယ်ကျက်သရေဆောင် အောင်ဗောဓိဘုရားဂေါပက ပြန်လည် ဖွဲ့စည်းပေးရေး...ဒို့အရေး” တောင် ဒဂုံမြို့နယ်အတွင်း တစ်ဦးတည်းပိုင် နာမည်ဖြင့် ရယူထားသော မီးတားကွင်းမြေများအား ပြန်လည်ရရှိရေး ... ဒို့အရေး” “လမ်းမပေါ်ရှိ စည်ပင်မြေများပေါ်တွင် ကျူးကျော်ခြံခတ်ထားခြင်းကို သက်ဆိုင်ရာဌာနများမှ စိစစ်အရေးယူ ဖယ်ရှားပေးရေး...ဒို့အရေး” “အောင် ဗောဓိဘုရား အလှူခံပုံးအတွင်းမှ ငွေ ၃၀၀ ကျပ်ခိုးယူသည်ဟုဆိုကာ ကလေးသူငယ်သုံးဦးအား ပုဒ်မ ၃၇၉ ဖြင့် မတရားစွပ်စွဲထားသည့် မိဘရိပ်နိုင်ဦးနှင့် ဂေါပကလူကြီးများအား ဖယ်ရှားပေးရေး... ဒို့အရေး”စသည့် ကြွေးကြော်သံများဖြင့် ဆန္ဒပြကြသည်။
ပြည်သူများ၏ ကန့်ကွက်ဆန္ဒထုတ်ဖော်မှုနှင့် ပတ်သက်၍ တောင်ဒဂုံမြို့နယ် မဲဆန္ဒနယ် (၁) မှ လွှတ်တော် ကိုယ်စားလှယ် ဦးညီညီက “ဒီမိုကရေစီကို စစ်မှန်စွာ ဖော်ဆောင် နေတဲ့ ပြည်သူ့အစိုးရ လက်ထက်မှာ ဒီလိုမျိုး လမ်းမပေါ်ထွက်လာတဲ့ ပြယုဂ်က တကယ့် တကယ်တော့ မကောင်းဘူး။ ပြည်သူတွေကို မကောင်းဘူးပြောတာ မဟုတ်ဘူး။ ဖြစ်သွားတဲ့ကိစ္စအပေါ် မကောင်းဘူးပြောတာ” ဟု ပြောကြားသည်။
ဆက်လက်ပြီး ကလေးသုံးဦးအား ကလေးသူငယ်ဥပဒေဖြင့် မဟုတ်ဘဲ ရာဇသတ်ကြီး ပုဒ်မဖြင့် အမှုဖွင့်ထားသည့်အပေါ် ဦးညီညီက “ကလေးသူငယ်တွေသည် ကလေးသူငယ်အခွင့်အရေး ပျောက်နေတယ်။ အရွယ်နဲ့မမျှတဲ့ ရာဇသတ်ကြီးပုဒ်မနဲ့တပ်ပြီး ဆွဲခံ ထားရတဲ့အတွက် ပြည်သူ့အစိုးရလက်ထက်မှာ မကောင်းတဲ့ဟာတစ်ခုလို့ ပြောချင်ပါတယ်။ တရားဥပဒေ စိုးမိုးရေးဝန်ထမ်းတွေအနေနဲ့ ဖိအားပေးမှုတွေကို မကြောက်ဘဲ မှန်ကန်တဲ့ ဥပဒေတွေကနေ ဆောင်ရွက်ဖို့အတွက် ပြောချင်ပါတယ်။ ဖိအားပေးမှုတွေကို ကြောက်နေမယ် စိုးရိမ်မယ်ဆိုရင် သူတို့ မှန်ကန်တဲ့ တရားဥပဒေစိုးမိုးမှုပေါ်လာမှာ မဟုတ်ဘူး”ဟု သတင်းမီဒီယာများ၏ မေးမြန်းမှုကို ပြောကြားသည်။
ယင်းအပြင် ရပ်ကွက်နှစ်ခုကြား မီးတားမြေပေါ်တွင် သီတဂူဆရာတော်၏ ဆေးရုံ တည်ဆောက်မည်ဟု ယခင်ကဆိုခဲ့သော်လည်း လက်ရှိ၌ အဆိုပါမြေကွက်လပ်သည် တစ်ဦးတစ်ယောက်ပိုင် ဖြစ်ပွားနေသည့် အတွက် ပြည်သူများ မကျေမနပ်ဖြစ်နေသည့် အပေါ်တိုင်းဒေသကြီး လွှတ်တော်ဥက္ကဋ္ဌနှင့် တိုင်းဒေသကြီးဝန်ကြီးချုပ်ထံ အကြောင်းကြားစာ ပေးပို့ပြီး တင်ပြသွားမည်ဟု ဦးညီညီ၏ ပြောကြားချက်အရ သိရသည်။
ကလေးသုံးဦးအား အောင်ဗောဓိဘုရား ဂေါပကအဖွဲ့ဝင်တစ်ဦးက တရားလိုပြုလုပ်ကာ ပုဒ်မ ၃၇၉ ဖြင့် တိုင်တန်းခဲ့သည့် အတွက် စက်တင်ဘာ ၁၃ ရက်တွင် တရားရုံး အချုပ်ထဲတွင် ခေတ္တ ထိန်းသိမ်းခံခဲ့ရပြီးနောက် ရဲစခန်းအချုပ်ထဲတွင် ခြောက်ရက် ထိန်းသိမ်းခံရသည်။ ယင်းနောက် သန်လျင် လူငယ် လေ့ကျင့်ရေးစခန်းကိုရောက်ရှိခဲ့ကာ လက်ရှိတွင် ကျောင်းသားများ စာမေးပွဲဖြေသည့်အချိန်ဖြစ်သည့်အတွက် အောက်တိုဘာ ၄ ရက်အထိ နေအိမ်တွင် နေထိုင်ခွင့်ရရှိခဲ့ကြောင်း သိရသည်။ ခွင့်ရက်ကုန်ဆုံးပါက သန်လျင် လူငယ်လေ့ကျင့်ရေးစခန်းသို့ ပြန်လည်သွားရောက်ရမည် ဖြစ်ကြောင်း သိရသည်။
